नेपाली हास्यव्यङ्ग्य अनलाइन पत्रिका

रमेश समर्थन :

गोरु बुढो हुन्छ, गुरु बुढो हुँदैन
गोरुले केही वर्ष “होक्काँ ! होक्काँ !!” गर्छ
केही वर्ष “हो काँ ? हो काँ ?” गर्छ
पहिले जुवाका सोइला भाँच्छ
जोतारा चुडाउँछ र फुक्काफाल उफ्रिन्छ
होक्काँ गर्नेलाई दाउन गाह्रो हुन्छ
जब दाइन्छ, सदिन्छ र सुमरिन्छ
उसले स्वीकार गर्छ
काँधमा जुवा
मुखमा मोहोले
पछिल्तिर हलो र हली
हलीको हप्की र लौरो
यी सब उसको जन्मपूर्व नै लेखिएका कर्म हुन्
जसलाई उसले आत्मसात् गर्छ
जोत्ने बेलामा खुवाइने कुँडो र पिँडोको आसमा
अरू दिन त अरूले जस्तै दाह्री नरगडी
मुखमा छिर्दैन एक तिरिन पनि ।
तर यो धेरै वर्ष टिक्दैन
बुढो भएपछि बिक्दैन र
किलोमै अल्पिन्छ उसको जीवन ।
तर गुरुको जोताइ चालीस वर्षसम्म पनि चालु छ
यति त गोरुको पुरै आयु पनि हुँदैन ।

०००
रुपन्देही