साइबर अपराध सम्बन्धी सचेतना सामग्री

हरियो साउन र दिन्न बरिलै

कसैलाई भोकै व्रत बस्दा त कसैलाई पेटभरि हसुर्दा आनन्द आएको छ । साउन त्यस्तो महत्त्वपूर्ण समय हो जुनबेला आँखा फुटेको गोरूले पनि बाह्रै महिना हरियो देख्छ ।

Nepal Telecom ad

रामप्रसाद पन्थी :

वर्षा ऋतुले गम्लङ्ङ अङ्गालोमा बेरेको छ । प्रकृतिले साउनरूपी हरियो गाउन लगाएकी छन् । खहरेहरू उन्मत्त भएका छन् । चराचर जगत उन्मुक्त छ । परम्परावादी किसानहरूले खेतमा रोपाइँ सकिसकेका छन् । आधुनिक किसानहरूले गमलामा धान रोपिसकेका छन् । कसैले धानको माला लगाएर फोटा खिचिसकेका छन् । टिक्टके, रिलवाला र युट्युवेहरूले हिलोमा टेकिसकेका छन् । साउनको पुण्य प्रतापले सबै आ- आफ्नो ढङ्गले भाइरल बनिसकेका छन् ।

धार्मिक तथा पौराणिक हिसाबले साउन महिना शिवजीका लागि प्रिय मानिन्छ । यसले शिवजीलाई स्वागत गरिसकेको छ । पार्वतीहरू शिवभक्तिमा लीन भइसकेका छन् । साउन शिवमय बनिसकेको छ । विवाहित महिलाहरू घरपरिवार र श्रीमानको आरोग्यताका लागि व्रत बसिसकेको अवस्था छ । अविवाहित युवतीहरू शिवजी जस्तै वरका लागि कामना गरिरहेका छन् । बोलबम लेखिएका गेरू रङका भेस्ट लगाएर कमण्डुलु बोकेका पुरूष र गेरु रङकै साडी, सलवार-कुर्ता लगाएका महिलाहरू ॐ नमः शिवाय लेखिएका चिटिक्क परेका झोला पिठ्युँमा भिरेर बोलबम-बोलबम भन्दै शिवालयहरूमा तीर्थाटन गरिरहेका छन् । ठाउँ ठाउँमा शिव पुराण लागेको छ । सप्ताह भएका छन् । कोटीहोम लागेका छन् । भागवत् ज्ञान महायज्ञहरूमा कथा वाचन भइरहेका छन् । दानवीरहरू दान गरिरहेका छन् । भजन, कीर्तन र नृत्यहरूमा रसिकहरू रमाइरहेका छन् । धार्मिक गुरु महाराजहरूले प्रभाव जमाइरहेका छन् ।

साउनको महिना अपरम्पार छ । साउनको महिमा अपरम्पार छ । साउन सबैका लागि इच्छाधारी बनेर आएको छ । साउनको आगमनसँगै व्यापार, व्यवसाय र अर्थतन्त्रमा हरियाली छाएको छ । फेन्सी पसल, ब्युटी पार्लर, आभुषण केन्द्रहरू आकर्षणका केन्द्र भएका छन् । गृहस्थ नारीहरू स्वर्गका परी बनेका छन् । हरिया चुराले नाडीहरू सजिएका छन् । हरिया साडीमा नारीहरू पहाड बनेर ठडिएका छन् । शिरदेखि पाउसम्मका अङ्गहरूमा गहना लपक्क छन् । हत्केला र पाखुरीहरू म्हेन्दीले धपक्क छन् । ठाउँ ठाउँमा खोपिएका ट्याटुहरू आकाशका जुन र ताराहरूझैं टल्किएका छन् । आँखै तिर्मिराउने गरी शरीरहरू झल्झल झल्किरहेका छन् ।

साउनले नारीहरूको तीजलाई आमन्त्रण गरिसकेको छ । मादलका तालहरू बजिसकेका छन् । नारीहरू लैबरी र बरिलैको भाकामा फन्किसकेका छन् । जोइटिङ्ग्रे पोइहरू कुनातिर थन्किसकेका छन् । पोइटिङ्ग्रे जोइहरू मन्किसकेका छन् । मत्ताहरू मात्तिइसकेको अवस्था छ । ढोईहरू आत्तिइसकेको अवस्था छ । कात्तिकेहरू रमाउन थालेका छन् । चैतेहरूले समाउन थालेका छन् । रत्यौलीका रतिहरू रन्किसकेका छन् । कामदेवहरू भन्किसकेका छन् । त्यसैले त अहिले “ बिहे अघि दिन्न बरिलै बिहे पछि दिन्छु बरिलै” घन्किसकेका छन् । कसैलाई बिस्ताराले पोलेर खपिसक्नु छैन । एसी, कुलर र पङ्खाहरूले शीतलता दिन सकेका छैनन् । मान्छेहरू बिस्तारामा सुत्न, बस्न नसकेर बस्तारामाथि बुरुक् बुरुक् उफ्रिरहेका छन् । मनभित्रको चाहको डाहले भत्भती पोलिरहेका अङ्गहरूलाई साउनले जसरी भए पनि शीतलता दिन सकोस् शुभकामना दिन चाहन्छु ।

केही वर्ष पहिले यस्तै बेलामा कसैले “पोइल जान पाम् शिव” भन्दै वर मागेका थिए । कसैले “पोइल जान पाम् शिव भन्नेलाई मैले लान पाम्” भन्दै वधु मागेका थिए । शिवजीले यिनको पुकारा सुने होलान् कि नाइँ ? कसैलाई केही जानकारी भए मलाई पनि बताइदिनु होला । यदि शिवजीले सुनेका छैनन् भने शिवप्रतिको जनविश्वास अवश्य टुट्न जानेछ । बिस्ताराले पोल्नेहरू जलेर खरानी हुने डर छ । बिहे अघि दिन्न बरिलैहरू बरू बाँच्लान् । बिहे पछि दिन्न बरिलै भयो भने ती पनि ठहरै हुने हुन् कि ? यो बबुरोलाई असाध्यै चिन्ता लागेको छ ।

संसार पनि बडो बिचित्रको छ । कतै साउनले महिनाभरि माछामासु र असन नखाएर व्रत बसेको छ । खरानी घसेको छ । आँखा चिम्लेर पलेटी कसेको छ । कतै खसी, बोका, राँगाहरूको भुटुवा र सुकुटीभित्र पसेको छ । बोतलका गोरसहरूसित सितन लिएर बसेको छ । सुनेको छु साउनको आगमनसँगै तीजको दरले आधुनिकतासँग साइनो लगाइसक्यो अरे ! आजभोलि दरले होटल र पार्टी प्यालेसहरूसँग सेटिङ मिलाएर डेटिङ् बसेको गाइँगुइँ चलेको छ । जो जतासुकै पसोस् । जोसित बसे पनि बसोस् । चियोचर्चो गर्नु राम्रो होइन । माइलीले परारै भनिकी हुन् “जमाना फेरियो साइली ।” बुढापाकाले भन्थे – “देश अनुसारको भेष हुन्छ । टाउको अनुसार केश हुन्छ । जमाना अनुसार चल्न नसक्ने नबोलेकै वेश हुन्छ । आफ्नो विचार अनुसार चल । तिम्रो आफ्नै शरीर हो । आफूलाई मन लागेको कुरा शरीरमा दल । समय अनुसार रङ बदल ।”

साउन आउनाले वर्षा लाएको छ । हरियाली छाएको छ । इच्छा अनुसार कसैले खरानी त कसैले पाउडर घस्न पाएको छ । कसैले भजन त कसैले रत्यौली गाउन पाएको छ । कसैलाई भोकै व्रत बस्दा त कसैलाई पेटभरि हसुर्दा आनन्द आएको छ । साउन त्यस्तो महत्त्वपूर्ण समय हो जुनबेला आँखा फुटेको गोरूले पनि बाह्रै महिना हरियो देख्छ । मान्छेका लागि त झन् यो वरदान सावित भएको छ । आगामी दिनमा विष्णुमतीको मुलाजस्तै मौलाउँदै जाओस् । हरियो साउनले सबैको कल्याण गरोस् । सबैमा हरियो साउनको शुभकामना ।

०००
२०८१ साउन २६
रेसुङ्गा न पा २ छापटोला, गुल्मी ।

Subscribe
Notify of
guest

0 Comments
Oldest
Newest Most Voted
Nepal Telecom ad
चैतकाे बाँदर

चैतकाे बाँदर

रामप्रसाद पन्थी
दशैंसँगै रित्तिएकाे मन

दशैंसँगै रित्तिएकाे मन

रामप्रसाद पन्थी
सातामा विदा सात दिन

सातामा विदा सात दिन

रामप्रसाद पन्थी
ढाेग दियाँ

ढाेग दियाँ

रामप्रसाद पन्थी
झिङ्गे दाउ

झिङ्गे दाउ

रामप्रसाद पन्थी
मोबाइलको ठाँडो

मोबाइलको ठाँडो

रामप्रसाद पन्थी
0
Would love your thoughts, please comment.x
()
x