नेपाली हास्यव्यङ्ग्य अनलाइन पत्रिका

हृषीकेश बराल :

सकल फटाहा, घरमा छन्
रगत सबैको, पिउँदै छन् ।
असुर तिनै हुन्, जिउँदै छन्
प्रतिदिन यस्तै, थपिँदै छन् । ।१

शठ खल पापी, नित फालौँ
विधिगत कारा, सब हालौँ ।
घरभरि शोला, अझ बालौँ
अपयश फाल्ने, क्रम थालौँ । ।२

महल बनाए, धन खाई
शरम पचाए, स्तुति गाई ।
पतित हटाऔँ, नय खोजौँ
स्वगृह सपार्ने, विधि रोजौँ । ।३

यदि धन पाए, जन बेच्छन्
स्वजन विदेशी, पनि भन्छन् ।
कुजन यिनै हुन्, ठग पापी
सुजनहरूका, अति घाती । ।४

कतिपय राम्रा, पर भागे
अवसर खोज्दै, घर छाडे ।
घरतिर बस्ने, सुन खान्छन्
पहूँच पुर्‍याई, लुकिराख्छन् । ।५

हृदय रुवाए, जननीको
जिउ धन खाए, निमुखाको ।
अझ पनि उस्तै, मति गर्छन्
नरक निवासी, हुन खोज्छन् । ।६

असु नरहेमा, शव बन्छन्
मरघट जान्छन्, कति लान्छन् ?
तर पनि लोभी, किन हुन्छन् ?
कि मरण पश्चात्, धन बोक्छन् ? । ।७

०००
पोखरा -२६ कास्की ।