नेपाली हास्यव्यङ्ग्य अनलाइन पत्रिका

बालकृष्ण खनाल :

चिरिप्प मुखमा लाग्यो ठुस्स गनाउने जल ।
ब्रह्मा विष्णु सबै पिन्छन् सोचेर फलको रस ॥१

थोरै पिउँदा खुसी हुन्छन् मिठामिठा कुरा गरि ।
चर्काचर्की कुरा गर्छन् पिएपछि अलीबढी ।२

जति जति पिँदैगर्छन् उतिउती कराउँछन् ।
नारिन्छन बाघको साथ अब कहाँ डराउँछन् ॥३

बेच्ने साहु डराएर भन्छ जाउ भयो अब ।
नितारेर दिएको हुँ भएको सकियो सब ॥४

ब्रह्मा विष्णु कहाँ मान्छन् लागि सकेपछि नसा ।
दिने भए छिटो देऊ नत्र तिम्रो भयाे दशा ॥५

विष्णु भन्छ भयो जाऊ ब्रह्मा भन्छ कहाँ भयो ।
ब्रह्मा विष्णु थिए लड्दै साहु भागेर पो गयो ॥६

खाएपछि नखानेले बोक्रोसम्म चपाउँछन् ।
ब्रह्मा विष्णु बसे खान सित्ती कहाँ अघाउँछन् ॥७

खाँदा खाँदै गरे युद्व ब्रह्मा विष्णु महेश्वर ।
चिच्याकल गरेको त्यो सुनिदै पो थियो पर ॥८

विष्णु कहाँ हराएछन् ब्रह्मा एक्लै पुगे घर ।
विष्णु हराउँदा खेरी सबैलाइ भयो डर ॥९

हल्ली खल्ली भयो सारा मध्यराती सबैतिर ।
डाँडामाथि थियो बाटो चारैतर्फ थिए भिर ॥१०

०००
टीकापुर, कैलाली