नेपाली हास्यव्यङ्ग्य अनलाइन पत्रिका

हरिप्रसाद उप्रेती  :

सामाजिक सञ्जालको पाटोमा
मुहारिकाको लोकप्रिय आँठोमा
मनमा सङ्गालेका अनुभूतिका गाँठोमा ॥

कोही भक्तिका माला जप्दै हुन्छन
कोही आक्रोशका भाला घोप्दै हुन्छन्
कोही प्रतिशोधका प्याला पोख्दै हुन्छन् ॥

शिष्टाचारको सीमा भत्काएर
निकृष्टताको पर्दा उतारेर
व्यक्तिगत तिक्तताहरू उजागर गरेर ॥

आक्रमण र प्रत्याक्रमण गर्ने उत्साह भरेर
दिन र छिन नाप्दै शब्दका विन्यासहरू छरेर
कथा व्यथा निराशा अनि मनका अन्तर्भाव पोखेर॥

स्वार्थको भावलाई आदर्शको लेपन लगाएर
चाकरीको नियतलाई सिद्धान्त बनाएर
मूल्य र मान्यतालाई क्षतविक्षत बनाउदै
झूट र मिथ्याका शब्द वर्षाएर
सत्प्रयासमाथि गरेको नाङ्गो प्रहार देखिरहेको छु ॥

०००
काठमाडौं