मीनप्रसाद लामिछानेकेही फरक पर्दैन
केही फरक पर्दैन हामीलाई शासक रावण हुन् कि राम हामी त केवल सीता न हौँ एउटाले दासी बनाएर पाल्छ अर्कोले जिउँदै आगोमा हाल्छ ।
मीनप्रसाद लामिछाने :
केही फरक पर्दैन हामीलाई
शासकले श्रीपेच लाऊन्
कि टोपीमा आऊन्
हामी त केवल रैती न हौँ
एउटाले बोले पनि मार्छ
अर्कोले खान नदिएर भोकै पार्छ ।
केही फरक पर्दैन हामीलाई
शासक ब्यालेट लिएर आउन् कि बुलेट लिएर
हामी त केवल वस्तु न हौँ
एउटाले कौडीका भाउमा किन्छ
अर्कोले खोसेर लिन्छ ।
केही फरक पर्दैन हामीलाई
शासकले कुरा
हुने खानेका गरुन् कि हुँदा खानेका
हामी त बटुवा न हौँ
एउटाले जाँदा लुट्छ
अर्कोले फर्कँदा बाटो ढुक्छ ।
केही फरक पर्दैन हामीलाई
नेता पक्षको होस् कि विपक्षको
हामी जनता त केवल भर्याङ न हौँ
एउटा काँधमा चढेर सत्तामा जान्छ
अर्कोले सक्दैन खुट्टा समाएर तान्छ ।
केही फरक पर्दैन हामीलाई
शासक रावण हुन् कि राम
हामी त केवल सीता न हौँ
एउटाले दासी बनाएर पाल्छ
अर्कोले जिउँदै आगोमा हाल्छ ।
केही फरक पर्दैन हामीलाई
शासक पाण्डव हुन् कि कौरव
हामी त केवल द्रौपदी न हौँ
एउटाले जुवामा हार्छ
अर्कोले सभामा नाङ्गेझार पार्छ ।
०००
हेटौंडा
‘मैले जिउन जानिनँ’ (२०७८)
Subscribe
Login
0 Comments
Oldest
