नेपाली हास्यव्यङ्ग्य अनलाइन पत्रिका

सुभाषचन्द्र देवकोटा :

हिजो जीनपैट लगाउँदा
भाटे कारबाहीमा पर्ने हामी !
आज टाई-सुट लगाउने तिमी !

हिजो बुर्जुवा शिक्षाको नाउँमा
स्कुल जान नपाउने हामी !
आज आफ्ना छोरा छोरीलाई
विदेश पढाउने तिमी !

हिजो मन्दिरमा जाँदा
कुटाई खाने हामी!
आज भैसी र राँगो पूँजा गरेर
ग्रह शान्ति गर्ने तिमी !

हिजो विस्तारवादको विरुद्ध
सुरुङ्ग युद्ध गर्ने हामी !
आज सत्ताको लागि
विस्तारवादीको काखमा सुत्ने तिमी !

हिजो सामन्तवादको बिरुद्ध
बन्दुक बोक्ने हामी !
आज तीनै सामन्तीवादिसँग
कुम मिलाएर हामी लुट्ने तिमी !

हिजो कानको सुन
बेचेर पार्टी चलाउने हामी !
आज एरपोर्टका तस्करी सुन
घर भित्र्याउने तिमी !

हिजो विचारसँग विमति राख्दा
कारवाहीमा गोली खाने हामी !
आज विचार बेचेर
सत्ता किन्ने तिमी !

हजार जिब्रा भएका शेष नागले
पनि बयान गर्न नसक्ने
तिम्रो क्रन्तिकारी चरित्रको
जय होस्
क्रान्तिवीरको सत्ता यात्राको
जय होस् ।

०००
गोरखा, हाल काठमाडौं