नेपाली हास्यव्यङ्ग्य अनलाइन पत्रिका

गोपालप्रसाद दाहाल :

बन्दैछ खाली नेपाल आज पहाड हिमाल
मानव शून्य हुँदैछ देश ठगीको सञ्जाल
तराई बाँझै अन्नको खानी बारीमा नजाने
विदेश जाने सबैको इच्छा बस्नेले के खाने ॥१ ॥

युवा नै छैनन् गाउँमा हेर सहर छ खाली
पहाडी घर भत्किए सबै लडेछन् अर्माली
मर्मत गर्ने पाखुरी छैनन् बाता र चोयाले
बस्ने नै छैनन् चाहियो किन भन्दैछन् ती बाले ॥२ ॥

मरेझैं लाग्छ ती अग्ला घर पाउले नछुँदा
अँध्यारा भए सन्तती कुनै स्वदेश नहुँदा
खाली छन् बाटा बजार शून्य छ ठप्प व्यापार
झुण्डिन थाले व्यापारी यहाँ तड्पाई नमार ॥३ ॥

पलायो झाडी छतको माथि मानव नहुँदा
पालेर बाघ खाएछ युवा सुन्दैन ती रूँदा
भत्ताले सत्ता साटेर लुट्छ देशको ढुकुटी
काढेर छाला सत्ताले खान्छ मान्छेको सुकुटी ॥४ ॥

उद्योग बन्द देशका भए रोज्गारी मासिए
आर्थिक क्रान्ति गरियो उल्टो दलले यै दिए
मुलुक लुट्ने जनता बेच्ने हिंसाको छ खेल
सामान्य बन्यो नेपालभित्र जाँदैन त्यो जेल ॥५ ॥

जुकोझैं चुसी रगत हाम्रो महल बनायो
विरोध गर्ने लखेटी शक्ति शासक रमायो
सिध्दान्त दारा भएछन् आज जनता तड्पाई
सल्सली निले स्वदेश आफैँ निर्लज्ज चपाई ॥६ ॥

कोखको शत्रु बनेर आयो नेपाल आमाको
मारेछ माया पैसाका सामु झुकाई शिर त्यो
वारिशे बनी शत्रुको सदा सेवामा रमाई
बनायो खाली स्वदेश सबै सत्ता नै समाई ॥७ ॥

पुर्खाको मान हरायो सान स्वार्थमा बगेर
वीरको सन्तान् भतुवा बन्यो इज्जत फ्याँकेर
पारेर खोक्रो मुलुक आफ्नो विदेशी रिझायो
बन्दैछ खाली नेपाल देश आँखामा बिझायो ॥८ ॥

०००
दमक, झापा