नेपाली हास्यव्यङ्ग्य अनलाइन पत्रिका

गोपालप्रसाद दाहाल :

भो तिमी नडराऊ !
हाम्रा चिहानहरू भत्काएर
किनभने हाम्रा चिहानमाथि
तिमीले रङ्गशाला बनाइसक्यौ
तिमी बहादुर छौ ।

हाम्रा भावनामाथि खेल्न
सामूहिक चिहानहरू भत्काएर
हाम्रो अस्तित्वलाई नामेट पार्न
हाम्रा सन्ततिहरू
तिमीलाई चाहिँदैन
उनीहरूको मत तिमीलाई
आवश्यकता नै पर्दैन
किनभने तिमी जातीय राजनीति नै गर्दैनौ
बरू हाम्रा करङहरू पन्छाएर
हाम्रा चिहानहरूमाथि राजनीति नगरी
आदिवासी रङ्गशाला नाम राख्नु भन्दा
तिमी अर्कै ठाउँमा नयाँ नामको
रङ्गशाला बनाउने घोषणा गरी
आफ्नो बहादुरी देखाउँछौ
सामाजिक सद्भाव भड्काउन पछि पर्दैनौ
त्यसैले त तिमी राजनेता हौ ।

चिहानको आवाज सुन्न तिमीलाई फुर्सदै छैन
चुनाव आएपछि मात्र तिमी
चिहानमा गएर रोई रोई
पूर्वजका सन्ततिहरूलाई
छक्याएर गोहीका आँसु झार्दै
भोट माग्छौ ।

हुन त चिहानले तिमीलाई
भोट दिन पनि त सक्दैन
त्यसैले त हाम्रो चिहानलाई
उखेलेर फाली गौचरन बनायौ
धन्य छौ राजनेता !
तिमी यस्तै काम गर्दै जाऊ
तिम्रो विजय सुनिश्चित छ
किनभने,
चिहानबाट उठेर हामी
तिमीलाई मत खसाल्न
अवश्यै आउनेछौँ र तिमीलाई पनि
चिहानमै ल्याउने छौँ
अनि हाम्रो साथी बनाउने छौँ ।

०००
दमक, झापा