नेपाली हास्यव्यङ्ग्य अनलाइन पत्रिका

रामशरण न्यौपाने :

लैनाको पनि आस छैन सब नै थारा बकेर्ना भए
भत्काए खुद बार बेर दगुरी आफूखुसीमा गए
ठाडो पुच्छर लाउँदै सब पसे गैह्री खलोमा घरी
गोठै मात्र ठुलो भयो अब डिँगा पाल्छौ तिमी केगरी ?॥१

घाटामा व्यवशाय चल्छ कसरी थप्छौ ऋणै माथमा
सन्चो छैन बुवा मुमाकन हरे ! ती वृद्धका गाथमा
खाने फुर्सद छैन निभ्दछ चुलो छन् आँसुका नै झरी
गोठै मात्र ठुलो भयो अब डिँगा पाल्छौ तिमी केगरी ?॥२

फुर्ती मात्र ठुलो भयो शिव हरे! हामी हिमाली भनी
बाँझा चौर मिचे दलाल कतिले बिक्रीगरे त्यो पनि
देशै बन्दछ साँगुरो दिनदिनै पस्केर पेवा सरी
गोठै मात्र ठुलो भयो अब डिँगा पाल्छौ तिमी केगरी ?॥३

भोका छन् घरमा जहान सब नै दुब्ला तथा पातला
भ्रष्टाचार तथा विशाल घुसका चल्छन् जहाँ शृङ्खला
सारा केस लुकेर जान्छ घुसको माया र छाया परी
गोठै मात्र ठुलो भयो अब डिँगा पाल्छौ तिमी केगरी ?॥४

जुध्छन् आपसमा डिँगा अजङका भत्काउँछन् गोठ पो
टाल्ने काम गरेर बस्नु कति झन् खाई सधैँ चोट त्यो
भोका बालक दूधको रहरले रुन्छन् अहो! धर्धरी
गोठै मात्र ठुलो भयो अब डिँगा पाल्छौ तिमी केगरी ?॥५

कल्चौँडो बिच छैन दूध तनमा मात्रै छ घ्याम्पे भुँडी
बाँकी पत्कर नै रहेन बनमा खाएर बाँडी चुँडी
सानो गोठ यहाँ बनाउनु पर्‍यो लैना हरूले भरी
गोठै मात्र ठुलो भयो अब डिँगा पाल्छौ तिमी केगरी ?॥६

०००
भक्तपुर