नेपाली हास्यव्यङ्ग्य अनलाइन पत्रिका

बालकृष्ण खनाल :

किड्नी किन्न त मिल्छ ती गरिबका, नेता बलीयो भए ।
मिल्ला फेर्न कहाँ दिमाग जनको उल्टो मतीको भए ॥
नेताको कसरी भयो महल यो, सानो थियो झोपडी ।
पैसाले किनिदैन रैछ जनको, खाली भए खोपडी ॥१

खायो डम्म भुँडी भयो सुँगुरको, उल्टा बनायो मति ।
सुल्टो पार्नु थियो दिमाग जसको, मिल्ला कहाँ ओखती ॥
जे आयो मनमा उहीँ गरिगरी, हैरान पार्छस् कति ।
नेपाली जनले उठे समरमा, होला तेरो के गति ॥२

सक्ने मात्र कुरा गरे पनि भयो ढाँटेर बोल्छस् किन ।
क्षमा मिल्छ अझै तलाई जनको, सक्छस् भने सुध्रन ॥
पानी जाहज हेर चल्दछ भन्यो, डाँडा पखेरा भिर ।
माग्यो भोट फकाउँदै गरिका, फेर्छौ भनी तग्दिर ॥३

खोलामा पुलछैन तर्न गतिलो, अग्ला बने टावर ।
केही भन्न हुदैन हेर्छ जनको, देखाउँदै पावर ॥
कालो साँप रहेछ तुच्छ मनको, डस्दैछ यो देशको ।
छोड्यो धर्म र कर्म गर्न जनले, च्याती दियो भेषको ॥४

सोझा छन् जनता र पोत उसले, गर्दैछ चाहेजति ।
जाग्ने छन् जनता अतिहुन गए, अन्याय टिक्ला कति ॥
देखेनौ र छिमेकको गतिविधी, उल्टा बनाए मति ।
होला निष्य यहाँ कुनै बखतमा, बङ्गालको झै गति ॥५

०००
कैलाली