नेपाली हास्यव्यङ्ग्य अनलाइन पत्रिका

बद्रीप्रसाद दाहाल :

उल्टो अभ्यास गर्दा, विधिनियम तथा, ऐन नै घाइते छन् ।
स्वेच्छाचारी बनेका, प्रतिनिधि जति छन्, आइते काइते झन् ॥
आफै धामी र बोक्सी, अभिनय गरिँदा, घाइते संविधान-
पारे, स्वार्थी र दम्भी, कलुषित मनले, ल्याइते संविधान ॥

नारा खोक्रा र छोक्रा, नित खलबलमा, रम्दछन् दुर्विचार –
हर्ताकर्ता उनै छन्, विधि नियम यहाँ, गर्छ कस्ले सुधार ॥
ठूला वक्तव्यबाजी, घननन नगरा, घन्न घन्काउँदैमा ।
मान्दैनन् देववाणी, जनमन अहिले, रन्न रन्काउँदैमा ॥

सत्तापक्षी विपक्षी, दल गुट बलले, मिच्छ पार्टी -विधान ।
त्यस्ता एकाधिकारी, खल-कल मनले, खान्छ है संविधान ॥
आफ्ना आचार चोखो, गर मन-मुटुले, फल्छ आदर्श बाली ।
साँच्चै जीवन्त होला, नियम – विधि यहाँ, चढ्छ वैशाख लाली ॥

भ्रष्टाचारी लुटेरा नियम विधि मिची, गर्दछन् अट्टहास ।
चर्का जो काण्ड रच्ने अधम किन बँचे ? भन्छ हाम्रो समाज ॥
गर्दै मोलाहिजाले कतिपय खतुवा दण्डमा ल्याइँदैन ।
धोक्रे सर्कार गोब्रे अब जन जनले भन्दछन् चाहिँदैन ॥

०००
धादिङ