नेपाली हास्यव्यङ्ग्य अनलाइन पत्रिका

जगदीश्वर पोखरेल :

भर्छन् उन्नतिका भाका गर्तमा देश खस्कियो
स्वार्थी चिन्तनले गर्दा भ्रष्ट आचार उक्सियो ॥१

भृकुटी बाँसबारी खै लौडा काण्ड भयो यहाँ
गिट्टी र बालुवा खान्छन् बङ्गारा छन् तिखा जहाँ ॥२

चेली बेच्छन् दलालीले नाइके चुप्प बस्दछन्
दिल्ली बम्बै पुगे जम्मै गणिका हुन बाध्य छन् ॥३

सिँचाइ योजना खाए मेलम्ची खै गयो कहाँ
फोर्छन् पाषाण आफैँले बङ्गारा छन् तिखा जहाँ ॥४

सफा पार्छौँ भनी खाए वाग्मती गुरु योजना
दुर्गन्धित भएकै छ अझै खाने छ चाहना ॥५

सन्तुष्ट नहुने रै’छन् सत्ता भत्ता दिए यहाँ
घान कैल्यै नपुग्ने भो’ बङ्गारा छन् तिखा जहाँ ॥६

प्यास मेट्न भनी खाए कोशी र गण्डकीहरू
बाक्लो थियो मिले खाए छिमेकमा गए तरु ॥८

भुटानी नक्कली काण्ड रचेको छ जहाँ तहाँ
सुन टोक्न सकेकै छन् बङ्गारा छन् तिखा जहाँ ॥७

सहकारी निले सारा खरानी जनता भयो
चोखिने तरिका नौलो पत्नी त्याग गर्‍यो गयो ॥९

काण्डै काण्ड महाकाण्ड भएका छन् यहाँ उहाँ
नेपालै सक्दछन् टोक्न बङ्गारा छन् तिखा जहाँ ॥१०

०००
पाउँदीबजार, लमजुङ
सम्प्रति-विष्णुदेवी आवास, शतुङ्गल