नेपाली हास्यव्यङ्ग्य अनलाइन पत्रिका

सुशील रिजाल :

यो नाट्यशाला प्रिय लाग्छ पर्दा
साक्षी छ पर्दा छलछाम गर्दा
उत्पात गर्छन् तल माथि पर्दा
उध्रिन्छ पर्दा सजिलै न झर्दा ।

पर्दा उठाए पछि खुल्छ नृत्य
पर्दा हटाए पछि फुल्छ कृत्य
टाँगिन्न पर्दा अब सोच्नु पर्छ
मर्दा र पर्दा तब खोज्नु पर्छ ।

पर्दा उठाऊ सुनिने छ ताली
पर्दा झुलाऊ बुझिने छ लाली
तानेर पर्दा किन भाग्छ मान्छे ?
पर्दा लिई जोवन ढाक्छ मान्छे ।

छानेर पर्दा मन खोल्नु भन्छन्
कामै नपर्दा किन बोल्नु भन्छन्
पर्दा विरानो पनि हुन्छ आफ्नो
सन्त्रास पर्दा अनि बन्छ अर्को ।

हान्ने र तान्ने पनि मिल्छ पर्दा
टाढिन्छ पर्दा अतिचार गर्दा
पर्दा लगाए अविषाद जाग्ने
पर्दा उतारे भयभीत लाग्ने ।

संदिग्ध पर्दा अब च्यात्छु भन्छन्
तानेर पर्दा तब ढाक्न खोज्छन्
पर्दा अनौठो छवि चित्र छेक्ने
जाली छ पर्दा अवरोध देख्ने ।

खोज्दै छु यौटा म विशिष्ट पर्दा
चाहिन्छ पर्दा छलछाम गर्दा
पर्दैन पर्दा किन भन्छ सारा
पर्दा हटाए अनि देख्छ तारा ।

०००
काठमाडौं
२०८१/०६/१७