नेपाली हास्यव्यङ्ग्य अनलाइन पत्रिका

ईश्वर पोखरेल :

‘हेल्लो !’ ‘हाइ !’
‘के छ भाइ ?’
घाँटीमा मयल,
छातिमा टाई ।

खस्ने खस्ने
तर नखस्ने
झरेर विशिष्ट
इलाकामा बस्ने
गज्जब स्टाइल
बेजोड पैन्ट
वाह, टेलरमास्टर दाइ !

पाकेटमा कापी
कानमाथि पेन
कन्चटमा टाटु
बाहुलामा चेन

मोबाइल होस् दामी
क्लासभरिमै नामी
क्यामरा नि राम्रो होस्
खाजासाजा होस्; नहोस्
मोबाइलमा डाटा होस्

क्लास मेट
बाटामै भेट
क्याम्पस पुग्दा
सधैँ लेट

क्यान्टिनमा छिर्ने
कि क्लासमा पस्ने ?
क्लासमा पस्ने तर
लास्टमा बस्ने ।

एउटा मिस्डकल
केटालाई
अर्को ‘इस्क’कल
केटीलाई
‘इस्’कलले अर्को
साथीलाई डस्ने ।

‘सिस्टर’ माने— बहिनी
‘ब्रदर’ माने— भाइ
‘फादर-मदर’ माने—
लैनो गाई

बाई ! बाई !!

०००
बोझेपोखरी, ललितपुर