दशैँ !!

आङ् नाङ्गिएकामा नाना बनाइनु पर्थ्यो -कथित बडादशैँले कतै थाहा भए सुटुक्क मलाई भन्नोस् आर्त चेहराहरू ! भोका पेटहरू ! नाङ्गा आङ्हरू ! शीत चुहेका शिरहरू ! म शब्दको परिभाषा फेरिदिन्छु कथित झिकेर !!

कलानिधि दाहाल

कलानिधि दाहाल :

चाडवाडका नाममा
रमाइला रमणका नाममा
अझ बडाका शिरपेच भिरेर
थोत्रो
पुरानो
घिनलाग्दो चेहरा
बिफरको बिमारीझैँ
डण्डीफोरको तनधारीझैँ
दुबीको देहवासझैँ
म
तिमी
तपाईं
हामी
र हाम्रासामु
ठिङ्ग उभिएको छ
-कथित बडादशैँ
न शिर छ
न पाउ छन्
न स्वरूप छ
तैपनि
निधारभरि अछेता टाँसेर
पुरेतपण्डाका पेट
झुसिला डकार
अघाएको छ
-कथित बडादशैँ
अन्धविश्वासका
अन्धभक्तका
भाटभतेरको
जमात जम्मा गरेर
भेडे जुलुसमा
मठमन्दिर रमाएको छ
-कथित बडादशैँ
ढाँटछलका धनी
भ्रष्टमहारथी
मनमन्दिरका देवता
लात हाँनेर
तनपरिवार शृङ्गारचतुर
नाताकृपावादका मसीहा
कर्मचारी
र नौटङ्की नेताका
रित्ता खल्तीभित्र
बोनस विकासका नामले
गह्रुङ्गो बनेर अघाएको छ
-कथित बडादशैँ
बडा भनिने
कथित बडाकै हो
-कथित बडादशैँ
माथिल्ला
सुरक्षित सिसमहलमा
तल्ला
तारेपाँचतारे
अझ तल्ला
गाउँगल्लीका
झिङ्गे रेष्टुराँभरि
जित्नेहरूका जीवन
र हार्नेहरूका
जिउँदा लाश बनेर
जुवातासका
बनीवासमा
कतै
हाँसोको
हिमाल अग्लेर आएको छ
-कथित बडादशैँ
कतै
आँसुको सतरञ्जा
लम्पसार
सुतेर आएको छ
-कथित बडादशैँ
हिँसाका उद्दाएर
खुँडाखुकुरी
तरवार
तिनै अन्धभक्त
लामा लाम
र उदण्ड जमातका
अमानवीय
जामभरि
कतै
रगतको होली बनेर
रमाएको छ
-कथित बडादशैँ
कतै
आफ्नै माँशपिण्डका
गाँसजस्तै
दाँत उछिट्टिने
चोक्टा बनेर
गिजा ङिच्च हाँसेको छ
-कथित बडादशैँ
खै ?
बडा भए त
शीत चुहेका
छाना छाइनु पर्थ्यो
-कथित बडादशैँले
पेट भोकाएकामा
दाना बनाइनु पर्थ्यो
-कथित बडादशैँले
आङ् नाङ्गिएकामा
नाना बनाइनु पर्थ्यो
-कथित बडादशैँले
कतै
थाहा भए
सुटुक्क मलाई भन्नोस्
आर्त चेहराहरू !
भोका पेटहरू !
नाङ्गा आङ्हरू !
शीत चुहेका शिरहरू !
म शब्दको
परिभाषा फेरिदिन्छु
कथित झिकेर !!