नेपाली हास्यव्यङ्ग्य अनलाइन पत्रिका

हरिप्रसाद उप्रेती :

तिमीसँग मेरा केही जिज्ञासाहरू छन्
तिमी कहिले र कहाँ जन्मियौ
कुन भाषामा जन्मियौ
कुन अक्षरबाट जन्मियौ
तिमीलाई पहिले कसले जन्मायो ?

तिमी मान्छे भन्दा उल्टो रहेछौ
मान्छे र उनका कर्महरू निलेर बाँचेका रहेछौ
प्रकृतिका परिवर्तनहरू साँचेका रहेछौ
मान्छे भने तिमीलाई रच्दै जाने
तिमी भने मान्छेलाई निल्दै लाने ।

मान्छेको अस्तित्व छ र तिमी पनि छौ
मान्छे नभएको भए तिमी कहाँ हुन्थ्यौ
मान्छेहरूले तिमीलाई जोगाए
तिमीले केही मान्छेलाई जोगायौ ।

तिमी सभ्यता सिकाउँछौ
शासनका बान्की पढाउँछौ
हिंसा र हत्याका कथा सुनाउँछौ
विजय र पराजयका पाना देखाउँछौ
तैपनि मान्छेलाई बुझाउन सकेनौ ।

तिमी नभए पनि त म बाँच्न सक्छु
म भइन भने तिमीलाई कसले बचाउँछ र
तिमी बस्ने किताब र कलाकृतिहरू विलुप्त हुँदा
तिम्रो पनि अस्तित्व सकिने छ ।

त्यसैले म कहिलेकाहीँ डराउँछु
म सँगै तिमी पनि हराउँछौ कि भन्ने डरले
अनि सोध्न मन लाग्छ
तिमी मलाई बचाउँदै छौ
कि म तिमीलाई बचाउँदै छु ?

मैले त तिमीलाई थोरै भए पनि चिनिसकेँ
तर तिमीले कहिले पनि मलाई चिन्दैनौ
सायद तिमी शक्ति र भक्तिका सहारा भयौ
अरुलाई चिन्दै नचिन्ने तर्फ गयौ ।

तिमीले भविष्यलाई मार्ग निर्देश गर्दै गरे पनि
म निरुत्तर छु मेरा जिज्ञासाहरू प्रति
मृगतृष्णा जस्तै गरी जवाफको खोजीमा छु
तिमीलाई भेट्ने प्रयासमा
म आफ्नै वर्तमानमा हिँडिरहेको छु ।

०००
सिनामङ्गल, काठमाडौं