नेपाली हास्यव्यङ्ग्य अनलाइन पत्रिका

हरिप्रसाद उप्रेती :

म उचालिएको छु
सिटामोल खान नपाएको अवस्थामा
व्यङ्ग्य बनेर ठडाइएको भ्यूटावरसँगै
दोहोरिएर तेहोरिएर पदमा पुगेको उचाइसँगै ।

अकर्मण्य निस्काम र निष्क्रिय भएर
हम्मेसी नरचिने इतिहास बनाएर
आफ्नो जिल्ला र निर्वाचन क्षेत्रमा बजेट खन्याएर
आर्थिक हैसियतसँग मेल नखाने आलिशान महल ठड्याएर ।

हैँसियत नभएका आसेपासेलाई उच्च हैसियत दिलाएर
दलाल विचौलिया तस्कर र गुण्डालाई हात लिएर
दाश लम्पट धुपौरे र टाट्नेहरूको जयजयकार पाएर
देशलाई वैदेशिक ऋणको भारी बोकाएर ।

वर्षको तीन चार पटक गठबन्धन फेरेर
समर्थक र विरोधीहरूका मतदानका टाउका गनेर
भ्रष्टाचारका काण्डहरूमा अनिणर्यको बिर्को लाएर
बेलाबखत विदेशी प्रभु खुशी पार्न छिमेकमा धाएर ।

विकासका बजेटहरूमा कमिशनका नङ्ग्रा गाडेर
ठाउँ र समुदाय अनुसारका देवी देउता भाकेर
कहिले होलीवाइन र कहिले हिन्दूत्वका डिङ हाँकेर ।

सोच्नै नसक्ने गरी उचालिएको छु इतिहास रचेर
मनका भित्ता होइन कार्यालयका भित्तामा झुण्डिएर
पेट, गाला र कानका लोती सुन्निएर
विगतका यथार्थहरू सबै भुल्दिएर उचालिएको छु ।

तर डर छ मनमा अलिकति
दुर्गति पो हुने हो कि उत्तराद्र्धमा
उचालिएर आकाश छोए पनि
ड्यामोकल्सको तरवार म माथि उचालिएको देखेर
म भित्र भित्र डराएको छु ॥

०००
काठमाडौं