नेपाली हास्यव्यङ्ग्य अनलाइन पत्रिका

सुशील रिजाल :

फरक छन् कथा अलग धारमा
श्रमिक छन् सदा अधिक मारमा
कहर भोग्दछन् अमर सादगी
श्रम र सीपका सगर हुन् श्रमी ।

अबुझ छन् बडा रहरका धनी
बिलख काट्दछन् अजर हौँ भनी
विकल सोचमा अकल हुन्न कि !
श्रम र सीपका सगर हुन् श्रमी ।

शहरमा तिमी फरक ठान्दछौ
दमितका कुरा अभर मान्दछौ
अधम चुम्दछन् विनित चाँदनी
श्रम र सीपका सगर हुन् श्रमी ।

कृपण पातकी सबल छन् जहाँ
सकल जिन्दगी भ्रमित छन् त्यहाँ
कुपित चालको शरणमा तिमी
श्रम र सीप का सगर हुन् श्रमी ।

श्रमिकका कुरा नगर देशमा
विगत भुल्दछौ कपट भेषमा
पतित सोचले विलिन छौ तिमी
श्रम र सीपका सगर हुन् श्रमी ॥

जमिन जोत्छ जो रगत पोत्छ जो
कृपण दुष्टको कहर भोग्छ जो
सुमनका सफा नयन हुन् श्रमी
श्रम र सीपका सगर हुन् श्रमी ॥

०००
कीर्तिपुर, काठमाडौं