नेपाली हास्यव्यङ्ग्य अनलाइन पत्रिका

गायत्री लम्साल :

चोरलाई चोर हो भन्छु ,
कालोलाई कालो नै भन्छु ।
आफ्नो दुनो सोझ्याउनलाई
डाँकालाई पुजारी भन्दिनँ हजुर,
बरू म असल बन्दिनँ ॥

नीति, नियम, नैतिकताका
तस्करहरूलाई ।
आफ्नो भूँडी ठूलो पार्न
मानवता र देश बेच्न सक्ने,
मुरकट्टाहरूलाई ।
ठूलो मान्छे कसरी भन्नु ?
समाजसेवी भनेर,
ढोग गर्दिनँ हजुर,
बरू म असल बन्दिनँ ॥

बालबालिका, वयस्क र,
वृद्धवृद्धालाई मात्र होइन
विचारका, सिद्धान्तका,
बुद्धि, विवेक र आस्थाका
बलात्कारीहरूलाई ।
अदालतले निर्दोष सावित
गरे-गरोस् ?
अपराधीलाई -अपराधी नै भन्छु,
निर्दोषलाई छोड् भन्दै,
नाराबाजी र जुलुस गर्दिनँ हजुर,
बरू म असल बन्दिनँ ॥

आफ्नो गल्ति र घमण्ड
लुकाउनलाई,
गल्ली, सडक हँुदै सदनसम्म
घरपालुवा भएर समेत
भुस्याहा जस्तै भुकिरहनेहरूलाई
नमस्कार, अभिवादन,
लाल सलाम र जय नेपाल भन्दै
सलाम ठोक्दिनँ हजुर,
बरू म असल बन्दिनँ ॥

०००
काठमाडौं