नेपाली हास्यव्यङ्ग्य अनलाइन पत्रिका

हेमराज पन्त :

रोगी श्वान सुते सधैं पथ कुरी देखिन्छ ज्ञानी सरी ।
कालो नाग समान ऊ जहरिलो ईर्ष्या हलक्कै छरी ॥
बाटो छेक्न पुगे लुते कुकुरले हाँङ्गा बसेको चरी ।
जोडी प्वाँख उडे खुला गगनमा आशा सुनौलो भरी ॥१

रोपी नक्कल भावना बगरमा मुर्धन्य ज्ञानी बनी ।
देखे दीन विचारमा छ बबुरो हाँस्दै थियो बैगुनी ॥
साँप्रा मासु समीपमा छ मदिरा सम्मान बेग्लै दिने ।
वास्ता गर्दिन भन्छ मानव उही औकात तिम्रो चिने ॥२

खैरो श्वान इमानमा छ बलियो लोभी छ मान्छे बरा ।
तिम्रो तस्बिर बोटको नजिकमा देखे कुहेको जरा ॥
कैयौं चोट सही अगाडि म बढे को रोक्छ हेरौँ अब ।
यात्रा जीवनको हिँडे म सहजै पुग्नेछु चुम्दै नभ ॥३

पोल्ने तागत चाहियो यदि भने किन्दै सलाई बस ।
पानी स्वच्छ बनेर कल्कल बगे चिन्दै बुटीको रस ॥
हावामा छ अनेकता बुझ सखे केले बने हुण्डरी ।
सारा फोहर यी बगाउन भनी वर्षी भदौरे झरी ॥४

तारा चम्चम चम्किलो सगरमा सूर्यास्तभन्दा पर ।
कुत्ता भुक्दछ साँझमा दिनदिनै के लसज केको डर ॥
यस्तै हो गतिशीलता बुझ तिमी बम्केर भुक्ने गर ।
चाल्ने गर्दछु पाइला सफरमा जल्नेछ क्रोधी नर ॥५

०००
पाटन २ सिलङ्गा, बैतडी