यसो गरे कसो होला ?

यसो गरे कसो होला ?

रमाइलो भोज गरुन् सबैका भक्तजन सँगसँगै मोज गरुन् त्यसपछि के हुने रहेछ खोजकर्ताहरू खोज गरुन् यस्तो म सोच्ने गर्छु मनमनै सर्त एउटै छ मेरो यिनीहरू साँच्चै छन् भने !

रामदेव पाण्डे

रामदेव पाण्डे :

कहिलेकाहीं
एक्लै घोत्लिएर सोच्छु
फेरि आफैं झस्किन्छु
ला म पनि के के गर्न खोज्छु
अनि कें कें सोच्छु सोच्छु !
मैले सोचेकै भरमा कहाँ हुन्छ र ?
फेरि सोच्छु
नहुनै पो किन पर्यो र?
आखिर घर त घरै हो
कुनै मान्छेको घरमा
अर्को मान्छे जान र
मजाले बस्न भएझैँ
अल्लाहको घर
यानि मस्जिदमा
बुद्ध बस्न हून्छ कि हुन्न ?
बुद्धको घर गुम्बामा
अल्लाह बस्न मिल्छ कि मिल्दैन ?
परमेश्वरको घर चर्चमा
भगवान ईश्वर बस्न हुन्छ कि हुन्न
अनि भगवानको घर मन्दिरमा
परमेश्वर आएर बस्दा के हुन्छ ?
कति मान्छे भन्ने गर्छन्
भावनामा बहेर हो वा मनैदेखि ?
ईश्वर एउटै हो
रूपमात्र फरक हो
अनि त मेरो सोच गलत होला र ?
मैले सोचे जस्तै कसो नहोला र ?
ईश्वर अल्लाह बुद्ध र परमेश्वर
आइतबार
चारै जना मस्जिदमा
सोमवार गुम्बामा
मङ्गलबार चर्च र
बुधवार मन्दिरमा
पालैपालो डेरा सरुन्
हरेकले आफ्ना घर आएका
पाहुनालाई स्वागत गरुन्
रमाइलो भोज गरुन्
सबैका भक्तजन
सँगसँगै मोज गरुन्
त्यसपछि के हुने रहेछ
खोजकर्ताहरू खोज गरुन्
यस्तो म सोच्ने गर्छु मनमनै
सर्त एउटै छ मेरो
यिनीहरू साँच्चै छन् भने !