नेपाली हास्यव्यङ्ग्य अनलाइन पत्रिका

ई. कुमार खड्का :

हेर्दै त्रीपुर जस्ता लाग्ने महल आलिसान छन्
हाम्रै रगत पसिनाको रङ्ग शोभायमान छन्
भ्युटावर, गेट, सालिक असान्दर्भिक संरचना
श्रम, पसिनाका भारी मूल्य त्यसै गुमनाम छन् ।

संचित मुद्रा सिध्याउँदै विदेश भ्रमण हिन्नुपर्छ ?
पोलिखाने मकै छैन विलाशिता किन्नुपर्छ ?
यिन्को चाला बुझ्नुपर्छ, राष्ट्रलाई धोका दिने
देश टाट पल्टाउने अब कुटिल ध्येय चिन्नुपर्छ ।

सरकार भ्युटावर र गेटमै झकिझकाउ हुन्छ
गठबन्धन सरोकारको सालिकमै बहकाउ हुन्छ
पारिवारिक प्रतिष्ठान राज्यकोषको दुरुपयोग
ढाँट्ने र लुट्ने बुद्धि कहिलेसम्म टिकाउ हुन्छ ?

कृषितन्त्र सुधार गर्ने सृजनशील बजेट छैन
रासायनिक मल बनाउने उल्लेखनीय प्रोजेक्ट छैन
श्रमजीवि अलपत्र छन् रोजगारीकै पिरलोमा
लठिभद्रे व्यवस्थापन कुनै आयाम पर्फेक्ट छैन ।

रुग्ण उध्योग खुलाउने कुनै चहलपहल छैन
भोक,अभाव, गरिवीको प्रभावकारी हल छैन
जँड्याहा र गँजडीको मूर्ति पुज्न तँछाड मछाड
स्मारक र सम्पदालाई जोगाउने छलफल छैन ।

बेमौसमी बाजा ठोक्नु बुद्धिमानी कर्म होइन
बालुवाको घर भत्किँदा दुखी बन्नु मर्म होइन
आफ्नो औकात के हो कुन्नि ? सधैं हात उत्तानै छ
सुकुलगुण्डा फुर्मासीमा धाक हान्नु सर्म होइन ?

जङ्गलको रावणराज हिट भएरै चल्ने भयो
शिशु तन्त्र जरैदेखि सिरीखुरी ढल्ने भयो
गठबन्धन हैन रै’छ, ठगबन्धन भन्छन् सबै
श्रीलंका, युक्रेन जस्तै राष्ट्र आखिर जल्ने भयो !!

०००
आलापोट, काठमाडाैं ।