नेपाली हास्यव्यङ्ग्य अनलाइन पत्रिका

हरिप्रसाद उप्रेती :

कोही भन्छन् शुभकामना छ
कोही भन्छन् निरन्तरता रहोस्
अझ प्रगति र उन्नति छावस्
ग्रेट वर्क र किप् इट् अप

सुन्दर, रमाइलो, अव्सम
बधाई छ, अरू पनि देख्नपाउँ
सुन्दर जोडी, सुन्दर तस्वीर
सुन्दर परिवार, शुभ रहोस्
आहा क्या गज्जब, मीठो

हाम्रा सम्बन्धहरू यस्तैछन्
हाम्रो परिवेश यही वृत्तमाछ
यसैको रसस्वादन भैरहेछ
यही रङमङाइमा समय बितिरहेछ

खै किन हो
हामी यसैमा रमेकाछौं
यसैमा भुल्लिएकाछौं
यिनै कुराहरू खोजिरहन्छ मनले
सञ्जालहरू भरिन्छन् यिनै रङले

न सजीवता छ न गहनता नै
भित्र फुको बनेर बग्ने भेल जस्तै
गहिराइ खोतल्ने कस्को जाँगर
समीक्षा गर्ने कस्लाई फूर्सद

अझ बेफूर्सदी देखाएर
कहिले हाब्रो बाएको पठायो
कहिले बुढी औँला ठड्यायो
मुटुस्वरूपी नै पठाए पनि हुन्छ

कमेन्ट र लाइकमा शेयर र रिपोष्टमा
रमाउँदै रन्थनाउँदै र डुबुल्की मार्दै
समुन्नतिका पाइला टेक्ने रहर
सम्वृध्दिका सपना साँच्ने रहर

डुब्ने भिज्ने र पौडनेको त कुरै छाडौं
बाहिरी श्रृङ्गारमा चुर्लुम्म डुब्दै
हल्का टिप्पणीका बहुरूप हेर्दै
समयका चाङहरू बित्ने गर्छन् ।

०००
काठमाडाैं