जगदीश्वर पाेखरेलबाँच्न देऊ
उनै खान्छन् घुम्छन् सयल जगमा गर्न थाले मिची सोझा सादा शरम नहुँदा बन्छ भाले डसेका छन् डस्छन् अझ कति यहाँ पर्छ खप्न यिनैको मर्जीले प्रतिदिन बस्यौँ नाम जप्न ।।
जगदीश्वर पाेखरेल :
नदीनाला दिन्छन् पलपल यहाँ दिव्य ज्योति
धरा हाम्रो राम्रो मल जल दिए फल्छ मोती
बुटी दिन्छन् पाखा असल बिरुवा रोग हर्छ
निशा छायो धर्ती झलल बिजुली बाल्नुपर्छ ।।१
यता किन्ने छैनन् रगत पसिना पेट भर्ने
युवा जान्छन् खाडी कहर अति छन् खप्न पर्ने
खुराफाती गर्छन् सकल अगुवा देशवासी
भएका दु:खी छन् मलम नदिने स्वार्थ दासी ।।२
सदा राँको बाल्छन् छल कपटले लाभ लिन्छन्
सदा भोका नाङ्गा श्रमिक जनले भोट दिन्छन्
मिली सत्ता हाँक्छन् प्रतिफल स्वयं खान सक्ने
निमोठ्छन् सोझा छन् विमुख जनता मात्र न्याक्ने ।।३
उनै खान्छन् घुम्छन् सयल जगमा गर्न थाले
मिची सोझा सादा शरम नहुँदा बन्छ भाले
डसेका छन् डस्छन् अझ कति यहाँ पर्छ खप्न
यिनैको मर्जीले प्रतिदिन बस्यौँ नाम जप्न ।।४
कलाकर्मी भन्छन् मुलुक सकियो चल्छ होड
धराकर्मी रुन्छन् विपुल अगुवा डस्न छोड
कहाँ बस्ने खाने निलय नहुने छैन भेउ
यहीँ धर्ती प्यारो अनुपम हुँदा बाँच्न देऊ ।।५
०००
पाउँदीबजार, लमजुङ
सम्प्रति- सन्तोषीनगर, कलङ्की
Subscribe
Login
0 Comments
Oldest
