नेपाली हास्यव्यङ्ग्य अनलाइन पत्रिका

सुभाषचन्द्र देवकाेटा :

दासले,
उज्यालो हेर्नु हुँदैन।
आकासमा चरा उडेको देख्नु हुँदैन।
फूलको सुन्दरता हेर्नु बासना हुँदैन।

किन भने,
दासले हेर्ने भनेको
मालिकको आँखाले हो।
दासले बुझ्ने भनेको
मालिकको विवेकले हो ।
दासहरुले हिँड्ने भनेको,
मालिकको गोडाले हो।

दासहरुको स्वतन्त्रता
मालिकको आदेश हो।
दासहरुको धर्म, कर्म
मालिकको इसारा हो।
दासहरुको मन्दिर
मालिकको प्रदक्षिणा हो।

त्यसैले,
निजत्व हरण भएका दासहरुले
शिर उठाउनु हुँदैन
आँखा मर्काउनु हुँदैन
विवेकको कुरा गर्नु हुँदैन,
इमानको खानु हुँदैन।

सत्व गुमाएका
यस्ता दासहरुको
विगविगी आजभोलि
राजनीतिमा पनि छ।
अड्डा, अदालतमा पनि छ।
घर गाउँमा पनि छ।

तपाईंले पनि
यस्ता दासहरु कतै भेट्नु भयो भने
एक वचन बोल्दिनु होला।

०००
गाेरखा