नेपाली हास्यव्यङ्ग्य अनलाइन पत्रिका

राजेन्द्रप्रसाद अधिकारी :

केही गोठहरु छन् र ती गोठहरुमा
जीउ भरी मैला भुत्ला पलाएकाहरुको बथान छ
र जीऊभरी, त्यस्तै घीन लाग्दा रौं पलाएका
घुम्रिएको सिङ, अनि नाकबाट सिँगान चुहाइरहेका
भनौं केही नाइकेहरु पनि छन्
नाम जे सुकै दिए हुन्छ-
सांसद, संसद वा मन्त्रीहरु
जसरी चेस खेल्दा, गोटीहरुलाई
राजादेखि पिउसोसम्म भन्ने गर्छौं
वा भन्नुस्, केही फरक पर्दैन-
विशिष्ट, अति विशिष्ट वा नालायकहरु
यिनीहरुले सोच्ने र गर्ने भनेकै
खाने हो, चपाउने हो र उग्राउने हो
अनि फेरि खाने हो, चपाउने हो र उग्राउने नै हो

हेर्नुस् न खर्कका गोठालाहरुको चिन्ता-
भेडाहरुलाई घाँस खुवाएर पाल्नै सकिएन

जब बढ्दै जान्छ भेडाहरुको संख्या
धान्दैन खर्कका घाँसहरुले
गोठ बनाउनु भएको छ भने
गोठभित्रबाट निस्कदैन
विचार, आदर्श, सिद्धान्त र प्रतिवद्धता
अर्थात् लुगा लगाएका र लाज मान्ने मानिसहरु
त्यसैले, गोठभित्रबाट आवाज आयो भने बुझ्नुस्-
घाँस र दानापानी हाल्ने बेला भयो
अर्थात् ख्वाउने हो, पाल्ने हो र देखाउने हो
ठूला झलझलाकार गोठहरु, र बडेमान भेडाहरु… ।

०००
चण्डाेल, काठमाडाैं
२०८१ चैत ५ गते