नेपाली हास्यव्यङ्ग्य अनलाइन पत्रिका

रामशरण न्यौपाने :

खोजे खेद्न किसानले बलगरी बालेर राँको तर
खन्दै भव्य दुलो लुकेर रहुँला दामी बनाई घर
सक्छौँ मत्त भई पचाउन सबै खाएर कालो कुट
रित्तो पार्नु छ यो भँडार जसरी आओ मुसा हो जुट॥१

थालौँ गर्न लडाइँ फोर्न ढुकुटी फैलेर चारैतिर
पैल्याई घर गोठ मन्दिर तथा गुम्बा सबै आखिर
हाम्रोलागि छ खन्न खान जति नै चाहेसरी नै छुट
रित्तो पार्नु छ यो भँडार जसरी आओ मुसा हो जुट॥२

खोज्छन् पाल्न बिडाल मानवहरू पारौँ उछित्तो भनी
तर्साएर भगाउँछ्यौ सब मिली जाबो बिरालो पनि
धाबा बोल्नु छ जे गरेर जसरी फैलेर चारैखुट
रित्तो पार्नु छ यो भँडार जसरी आओ मुसा हो जुट॥३

कोही टाढिनु हुन्न यो मिसनमा दोसामिसीमा परी
हाल्नुपर्दछ काँध आपस मिली एकत्व साङ्लो गरी
पोल्टो भर्न सबै जुटौँ अघि बढौँ यौटै बनाऔँ गुट
रित्तो पार्नु छ यो भँडार जसरी आओ मुसा हो जुट॥४

मान्छेका भुसुना जहान घरमा भोकै र नाङ्गै मरुन्
हाम्रै सन्ततिले विशाल धरती भोग्ने दिलासा गरुन्
पारौँ पौरखले विशाल ढुकुटी सर्वत्रका भुस्कुट
रित्तो पार्नु छ यो भँडार जसरी आओ मुसा हो जुट॥५

०००
भक्तपुर