नेपाली हास्यव्यङ्ग्य अनलाइन पत्रिका

हरि कोर्काली :

धन्न मुलुकमा
भ्रष्टाचारको डढेलो दन्किएको छ
र, यत्राविधि महँगा महँगा–
स्कूल, कलेज खुलेका छन्‌
निजी अस्पतालहरू फले–फुलेका छन्‌
शहरको शोभा बढाउन भनेर
गगनचुम्बी भवनहरू उठेका छन्‌
व्यापारिक मलहरूमा विदेशी सामान
फटाफट् बिकेका छन्
मूल्य जतिसुकै चुलिए पनि
सुन पसलमा घुइँचो बढेकोबढेकैे छ
होटल र रेस्टुराँ तिर हुइँको चढेकै छ . .
सडकहरू जीर्ण छन् र पनि
अत्याधुनिक गाडीहरूले तिनको शोभा बढेको छ
हेर्दाहेर्दै नेपालीहरूको हैसियत
लाखौंका सुट र
करोडौंका घडी/चस्मा भिर्नेमा पुगेको छ
कर्मचारीहरू खाइलाग्दा, बिचौलियाहरू हाइलाग्दा र
व्यापारीहरू डाहीलाग्दा भएका छन्‌ ।

भ्रष्टाचारकै भरमा
नेपालीको बचत
स्वीस बैंकमा
र, लगानी विदेशी कम्पनीहरूमा पुगेको छ
भ्रष्टाचारले विकास हुन दिन्न भन्नेहरूकै अगाडि
भ्रष्टाचारमै टेकेर विकासले
ठूलो फट्को मारेको छ
र, अब चाँडै नेपालीले नै
समुद्रको पिँधमा
बस्ती बसाउने छन्,
चन्द्रमामा गएर
होटल चलाउने छन् र
मङ्गलतिर गएर घडेरी खुलाउने छन् ।

धन्न मुलुकमा भ्रष्टाचार मौलाएको छ
र, भ्रष्ट जति सबैको गरिबी पनि नष्ट भएको छ
नत्र त हाम्रो हालत कस्तो हुन्थ्यो होला ?
भ्रष्ट र भ्रष्टाचारको जय होस
भ्रष्टाचारको सुगन्ध झन् झन् फैलियोस् ।

०००
भक्तपुर