नेपाली हास्यव्यङ्ग्य अनलाइन पत्रिका

हरि कोर्काली :

पद बिकेका छन्‌
पदोन्नति बिकेका छन्‌
पदाधिकारीहरू त झन्‌
छिन्छिनमै बिकेका छन् ।

खोला, नाला, कुला बिकेका छन्‌
ढुङ्गा, माटो, बालुवा बिकेका छन्
काठ, पाट, सेउला बिकेका छन्‌
इमान, जमान र नैतिकता बिकेका छन्‌
खुवादेखि युवासम्म जम्मै बिकेका छन्‌
खर्‍याक्खुरुक्कै बिकेका छन् ।

पानी बिकेको छ
जवानी बिकेको छ
मान, सम्मान बिकेका छन्‌
अङ्ग र इन्द्रिय पनि बिकेकै छन् ।

नागरिकता बिकेका छन्‌
राहदानी बिकेका छन्
निर्णायक र निर्णयहरू त झन्
खोजी खोजी बिकेका छन्‌
सुराक र सुराकी पनि बिकेकै छन् ।

शिक्षाको व्यापार मौलाएको छ
स्वास्थ्यको व्यापार मौलाएको छ
ठेक्कापट्टा र कमिसनको व्यापार मौलाएको छ
देह र स्नेहको व्यापार पनि मौलाएकै छ ।

मत र मतपत्रहरू बिकेका छन्‌
प्रश्न र प्रश्नपत्रहरू बिकेका छन्‌
साक्षी, प्रमाण र प्रमाणपत्रहरू बिकेका छन्‌
धर्म र धर्मात्माहरू पनि उत्तिकै बिकेका छन् ।

हुँदा हुँदा
फोहोर, मैला पनि बिकेकै छन्‌
ऐन कानुनका दफा पनि बिकेकै छन्‌
देशैभरि
जताततै / कदमकदममै
व्यापारैव्यापार छ
बिक्री नै बिक्री छ
सबै हाताहाती छ
फटाफटी छ
तैपनि अर्थमन्त्रीको मुखमा
व्यापार घाटा नै रहनी बनेर बसेको छ ।

पक्कै उनी गलत छन्‌
उनीसँग गलत डेटा छ
उनको डेटा समावेशी छैन
त्यस्तो डेटा उपलब्ध गराउने
उनको विभाग नै गलत छ
फलेफुलेका यति धेरै व्यापार व्यवसायको डेटामा
पहुँचै नभएको त्यो विभाग नै–
परम्परावादी छ
पश्चगामी छ
अपाङ्ग छ
अनि त देश पनि
गलत बाटोमै हिंडिरहेछ
यथास्थितिमै अड्किरहेछ ।

०००
भक्तपुर