नेपाली हास्यव्यङ्ग्य अनलाइन पत्रिका

रामशरण न्यौपाने :

आफ्नै पौरखबाट शोभित बनी चल्दै थियो जीवन
भ्रष्टाचार गरेर हाय सुतले गल्ती गर्‍यो बेस्कन
पीडामा कति वृद्ध छन् विरहले बस्ने कुँड्याई मन
भन्छन् वृद्ध हुलेछ नर्क सुतले खाएर कालो धन॥१

काट्छन् बात पछाडिबाट सबले गर्छन् इसारा अनि
धारेहात लगाउँछन् पर हुँदा भन्छन् मरेस् नै भनी
यो नेपाल लुटेछ हाय! कसरी पारेर ढुङ्गेमन?
भन्छन् वृद्ध हुलेछ नर्क सुतले खाएर कालो धन॥२

गर्छन् सज्जन लोक घुसधनको अत्यन्त निन्दा जहाँ
ठान्छन् सन्त महन्थ पण्डितहरू गोमांस जस्तै यहाँ
यस्तो शुद्ध समाजमा कलुषको के मान होला भन?
भन्छन् वृद्ध हुलेछ नर्क सुतले खाएर कालो धन॥३

धेरैको घरको कथा छ अहिले अत्यन्त विष्मातको
निन्दा गर्न समस्त लोक ठडिए सारा खुराफातको
भ्रष्टाचार गरेर जो जति बने हुन् देशका दुस्मन
भन्छन् वृद्ध हुलेछ नर्क सुतले खाएर कालो धन॥४

रातीमा घर फिर्छ त्यो दिनदिनै बोकेर झोला पनि
नेताको म पिए भनेर सबको खाएर सातो अनि
लौ अन्याय गरेर देश जनको साह्रै गर्‍यो दोहन
भन्छन् वृद्ध हुलेछ नर्क सुतले खाएर कालो धन॥५

झुप्रो एक थियो ढल्यो विगतको प्रासाद अर्कै बन्यो
भेट्टाएँ सरकारबाट सुविधा प्राडो पजेरो भन्यो
भ्रष्टाचार रहेछ राष्ट्र धनको भण्डारको उल्झन
भन्छन् वृद्ध हुलेछ नर्क सुतले खाएर कालो धन॥६

०००
भक्तपुर