नेपाली हास्यव्यङ्ग्य अनलाइन पत्रिका

उत्तम विचार :

म शब्द खेलाउँछु
ऊ नलेख भन्छ
म बोली बिसाउँछु
ऊ नबोल भन्छ
र पनि मलाई
अभिभावक भन्न कर लाग्छ
हो आमा !
मलाई सरकारसँग
डर लाग्छ

ऊ लोकतन्त्र अलाप्छ
म मूलमन्त्र सम्झाउँछु
ऊ गणतन्त्र अलाप्छ
म उसकै गीत गाउँछु
म अधिकार माग्न
सडकमा पुग्छु
ऊ घरका छतबाट
अश्रुग्याँसका सेल बर्साउँछ
म गल्लीमा हिँड्दै गर्दा
ऊ बन्दुकको नाल तेर्स्याउँछ
देख्दैन जिउँदै जल्न
बाध्य पत्रकार
सुन्दैन नागरिकको
चीत्कार
वास्तवमा
ऊ निकै अभर लाग्छ
हो आमा !
मलाई सरकारसँग
डर लाग्छ

कसरी भुल्न सक्छ्यौ
आमा !
तिम्री छोरी
निर्मला पन्तमाथिको
जघन्य अपराध
यो देशमा सरकार
सजीव थियो भने
न्याय पाउने थियौ
तिमीले
ऊ मरिसक्यो
मानौँ
ऊ भूत हो
त्यसैले त
तर्साउँछ घरीघरी
उसले जे बोल्यो
भन्नुपर्ने छ सदर लाग्छ
हो आमा !
मलाई सरकारसँग
डर लाग्छ

न्यायालय
उसकै चङ्गुलमा छ
ठान्छ परिवर्तन
आमूलमा छ
भोकानाङ्गा
देख्दैन ऊ
गरिबका कथा
लेख्दैन ऊ
आफ्नै कहानीमा
रुमलिन्छ ऊ
महत्व आफैँलाई
दिन्छ ऊ
भन्न सक्दिन
उसको उपस्थित
अवसर लाग्छ
साँच्चै आमा !
मलाई सरकारसँग
डर लाग्छ !!

०००
काठमाडाैं