नेपाली हास्यव्यङ्ग्य अनलाइन पत्रिका

घनश्याम रेग्मी :

गएको मात्र के देख्छौ साथी हो बिजुली यहाँ
आएको पनि हो उत्ति साथी हो बिजुली यहाँ ।
जानेको चिन्तना छोडौँ आउला र कहाँ न गै
आएकोमा गरौँ गर्व जाओस् आओस् सधैँ सधैँ ।

खिया लाग्यो कि पुर्जामा जोडिराख्दा निरन्तर
घाट पेच बसे हुन् कि खोली हेर्छन् छ के भर ।
मौकामा नगरे जाँच पुर्जा ती बस्न सक्तछन्
चेक जाँच गरौँ भन्दै खोलेका पनि वा हुनन् ।

निद्रा हुन्न कसैलाई उज्यालो बालियो भने
अँध्यारोमा परे बानी त्यो बन्दी गृहमा उनी ।
नासोको पद हो नासो जोगाई राख्नु कर्म छ
उसै शङ्का गरे लङ्का बिथ्थामा जल्न पर्दछ ।

कस्तो सिस्टम हो हाम्रो इष्टिमेटविना गयो
हिजो नाफा थियो भन्छौ घाटा वास्तवमा थियो
घाटा नाफा कहाँ हुन्थ्यो नातामा बात जेलियो
काखीको च्यापियो आफ्नो संयन्त्र घातमा गयो ।

हाम्रो नै कमजोरी हो इन्भर्टर नकिन्नु त्यो
बत्ती लाल्टिन जोहोमा राखे काम हुने थियो ।
मैन बत्ती कि वा बालौँ पालामा वा टुकी गरी
राज्यको भरमा पर्नु गल्ती हाम्रो सरासरी ।

समस्या घरमा भन्दा विशिष्ट राज्यमा हुने
चाहियो भन्दछौँ व्यर्थै खाँचो के राज्यको दिने ।
उज्यालोमान चाहिन्न अँध्यारोमान चाहियो
सबैको पेट खानाको सबैमा खान चाहियो ।

०००
बैजनाथ १, चिसापानी, बाँके