नेपाली हास्यव्यङ्ग्य अनलाइन पत्रिका

ई. कुमार खड्का :

नुनको घुनलाई सुनको सगुन मिल्दैछ रे
सुपथ खनिजलाई कुफतले खिल्दैछ रे
चिन्ताले होला लोकको रक्तचाप घटाउन,
चल्तीको व्यापार निगम चकारले निल्दैछ रे ।१

नीतिगत कुरा मिल्दा भित्री स्वार्थ हावी होला
विकेन्द्रीत स्पर्धाको निहुँ केन्द्रित दावी होला
दुनियाँलाई झुक्याउने सकुनिको चाल बन्दै,
बाहिर हेर्दा सेतो धुलो भित्रनै खरावी होला ।?२

बाँच्न सके नुनमा पनि किरा परेको सुन्नुपर्छ
जब अमिलो मिसिए पनि आयो नुन भन्नुपर्छ
यो कलियुग हो हजुर ! सुनमै खिया पर्छ होला,
अचम्म नमाने हुन्छ, रातमै सुन पित्तल बन्नुपर्छ ।३

दुनियाँकै सर्वसुलभ पहुँच पर सर्नसक्छ
नुन अमिलो विषादीले ढुँडी किरा पर्नसक्छ
होसियार ! यो शताब्दी नुन युद्धको युग बन्ला,
नुनको किरा नुन भित्रै स्वयं तड्पिदै मर्नसक्छ ।४

०००
आलापोट, काठमाडाैं ।