नेपाली हास्यव्यङ्ग्य अनलाइन पत्रिका

घनश्याम रेग्मी :

लक्का जवान अहिले गणतन्त्र हाम्रो
रातो पिरो र भरिलो रङको छ राम्रो
साँढे पसेर यसमा नचरून् भनेर
पर्खाल लाउन पर्‍यो जनता मिलेर ।१

चिन्ता भएछ यसको दरबारलाई
निस्के अरे सडकमा नगरा बजाई
शङ्का बढेर बिचरा गणतन्त्र लड्ने
थाँक्रा लगाउन पर्‍यो गणतन्त्र चढ्ने ।२

केही खुराक अझ थप्न रह्यो कि बाँकी
मोटाउने असल औषधि एक फाँकी
बेला छ आज लहरो सरलक्क बढ्ने
टेका नयाँ किसिमका गणतन्त्र अड्ने ।३

बन्ला दही कि यसमा रसले भरेको
त्यो चाख्न आज जनता पछि छौँ परेको
बिर्को कतातिर परेछ भएछ ह्वाङ्गै
पोखिन्छ बन्द नगरे छ सबै उदाङ्गै ।४

कस्तो किनेछ कपडा छ तुना विनाको
को हो वरिष्ठ यसको भर थेग भाको
लज्जा बचाउन सबै जन लाग्नुपर्ने
चिन्ता छ खस्छ कि कछाड समाल्नु पर्ने ।५

चौपाय पस्न पनि बेर भएन कत्ति
माया दया र ममता कि भएन रत्ति
नेतृत्व यो सबल छैन समस्त बेर्न
पर्खाल लाउन पर्‍यो गणतन्त्र घेर्न ।६

मन्त्री र संसदहरू तरबार भिर्छन्
नेपाल आज टुकुरासरि चर्र चिर्छन्
यी पोख्त लेखक यतातिर दाम जोर्छन्
खै देश उन्नत गराउन चित्र कोर्छन् ।७

भत्ता बुझाउन जुटे सब कर्मचारी
पाएर आसिक खुसी छ ठुलो छहारी
यस्तो अमुल्य गणतन्त्र सराप गर्छौ
आदेश माथितिर बाट छ जेल पर्छौ ।८

०००

०००