नेपाली हास्यव्यङ्ग्य अनलाइन पत्रिका

जगदीश्वर पाेखरेल :

हिमाली धरामा सयौँ जात जाति
फुलेका खुलेका नयाँ फूल ताँती
दिए नीर राम्र बगैँचा नमर्दै
बगैँचा समाली बसौँ स्नेह भर्दै ।।१

बनेली हरा भो’ फुलेको छ मौरो
डसी मात्र राख्ने सदा गर्छ भौँरो
यताका उताका पताका उडेका
लुटौ देश भन्दै कयौँ छन् जुटेका ।।२

नयाँ दृश्य चिन्ता कसै भित्र छैन
लुटी देश गर्ने भए नित्य चैन
बढी खानलाई खुबै चल्छ खेल
सबै भ्रष्टलाई मिले बेस जेल ।।३

कुरा मात्र गर्ने नयाँ काम हुन्न
विनाद्रव्य कैल्यै कुनै कर्म छुन्न
पुरानो हुनाले कुनै गोल दिन्न
बडो चित्त दुख्ने मनै हुन्छ खिन्न ।।४

यता हान्छ यौटा उता हान्छ अर्को
छली खेल खेल्ने सधैँ लाग्छ झर्को
लुरे बोट बोक्नै नसक्ने चिचिन्डो
बनेको छ सत्ता सबैको भकुन्डो ।।५

०००
पाउँदी, लमजुङ