नेपाली हास्यव्यङ्ग्य अनलाइन पत्रिका

सुभाषचन्द्र देवकाेटा :

ऊ जीवनको सपना देख्छ,
तिमी उसको सपना बेचेर घरको गजुर थप्छौँ।
ऊ दु:खको भारी बोक्छ,
तिमी उसको दु:ख बेचेर भकारी भर्छौँ।

ऊ काँध थाप्छ,
तिमी उसको काँध चढेर माथि उक्लिनछौँ।
ऊ पसिना बगाउँछ
तिमी उसको पसिनामा डुबुल्की मारेर
थकान मेटाउछौँ।

तिमी र उस्को फरक नै यहिँ हो।
उ दु:ख गर्छ,
पसिना बगाउँछ,
तिमी उसको दु:ख र पसिना निचोरेर
आफ्नो दूनो सोझ्याउछौँ।

ऊ सिमामा बसेर देश जोगाउँछ,
तिमी सिमाका खम्बा बेचेर भत्ता जोगाउँछौँ।
ऊ खाडीमा बसेर रगत बगाउँछ,
तिमी रगतमा राजनीति गर्छौ।

तिमी र उसको फरक नै यहिँ हो,
ऊ देशको सिमानामा मर्छ,
तिमी कुर्सिका लागि मर्छौं।
ऊ देशको मायाले रुन्छ,
तिमी सत्ताको मायाले रुन्छौ।

ऊ मिहेनेत गर्छ, ईमानको खान्छ
तिमी ठगी गर्छौ, बेइमानीको खान्छौँ।
ऊ निष्ठाको बाटोमा रमाउँछ,
तिमी छलकपटको बाटोमा रमाउछौँ

तिमी र उसको फरक नै यहिँ हो,
ऊ ईमानी छ,
तिमी बेमानी छौँ।
ऊ श्रममा विश्वास गर्छ
तिमी लुटमा विश्वास गर्छ।

०००
गाेरखा