नेपाली हास्यव्यङ्ग्य अनलाइन पत्रिका

रामदेव पाण्डे :

लोकतन्त्र हो हजुर यो
अधिकार छ
सबैलाई सबैथोकको
संविधानमै नभएको
राजा माग्न पाइन्छ
पुरुष सांसदले पनि
प्याड, सुत्केरी भत्ता र
विद्यार्थी खाजा माग्न पाइन्छ
मान्छेकोमात्र होइन हजुर
हरेक शब्दको अधिकार छ
नपत्याए हेर्नुहोस् त
बहुमत भएपछि
“झोले”ले टाउकोमा टेकिसक्यो
उता भ्रष्टाचारीले पनि
बुइ चढ्ने सपना देखिसक्यो
बहुमत पनि पुग्छ पक्कै
र एक दिन “हो म भ्रष्टाचारी” र
“हो म पनि भ्रष्टाचारी” काे
ह्यास ट्याग चल्छ
आजसम्म अपहेलित
“भ्रष्टाचारी” शब्द पनि
सम्मानित र पूज्य बन्छ
र बिस्तारै पालो आउन सक्छ
चोर, डाँका र बलात्कारीको
पाखण्डी र दुराचारीको
अधिकार खोज्दै खोज्दै
आजका अपमानित शब्द
हुनेछन् सबै सबै सम्मानित
र आजका
माननीय, सम्माननीय शब्दजति
सबै सबै अपमानित !

०००
काठमाडाैं