नेपाली हास्यव्यङ्ग्य अनलाइन पत्रिका

अमर अधिकारी  :

यति सुन्दर मुलुकमा देशघातीको प्रभाव:
कहिले पो सल्टिएला नैतिकताको अभाव।

जता हेर्योल त्यतै देख्छु भद्रगोल गति
जतिजति तहसनहस क्षति त्यतित्यति।

सत्ता कुर्सी खोसाखोस छ लुट्न छोड्ने कहिले ?
फटाहालाई काखी च्यापि पोस्छन् आज अहिले।

किन घात गर्छौँ मुर्ख सुन्दर धर्तिमाथि ?
ध्यान पनि दिदौनौ नि राम्रा अर्तिमाथि।

माफिया र गुण्डालाई किन सम्मान गर्ने ?
लुटको खेल देखिदेखि हामी छक्क पर्ने ?

सिंहदरबार रंगमञ्च अनि रंगशाला
भ्रष्टहरुको त्यसै हुन्छ राता चिल्ला गाला?

मरिसक्या अपराधीलाई पक्राउ पुर्जी जारी
नियम कानून किन फाल्छौ धुजाधुजा पारी।

परलोक भैसक्यालाई विपक्षी बनाउने
देशघातीले लाज नमानि टाउको कन्याउने।

नाटक धेरै चटक धेरै देशले सहन्न
नालायकको जगजगीले मुलुक रहन्न।

युवाहरु खाडी मुलुक किन लघार्छौ ?
यता गर्यो उता गर्यो छ धनै पघार्छौ।

हुतिहारा नेताहरुले देशै डुबाए
आशेपासे चम्चेलाई छ्याक्कन खुवाए।

सुन्दासुन्दै हेर्दाहेर्दै देश बर्बाद भयो
ऋण काढेर रिठे पनि खाडी मुलुक गयो।

०००
खुंग्री, रोल्पा। हालः बुढानिलकण्ठ, काठमाडौँ।