नेपाली हास्यव्यङ्ग्य अनलाइन पत्रिका

सुभाषचन्द्र देवकाेटा :

ऊ आफै चोर छ,
अरुलाई चोर देख्छ ।
ऊ आफै ठग छ,
अरुलाई ठग देख्छ।

स्यालले कुखुरालाई झुक्याए जस्तै,
पूर्व देखाएर पश्चिमतिर खान्छ।
उत्तर देखाएर दक्षिणतिर खान्छ।

ऊ आफै झुट छ,
अरुलाई झुट देख्छ ।
ऊ आफै फरेबी छ,
अरुलाई फरेबी भन्छ।

चोरलाई चौतारीमा राखेर,
साधुलाई शूली ठोक्छ।
आफ्नो भकारी भर्न,
अरुको घाँटी रेट्छ ।

ऊ आफै हरामी छ,
अरुलाई हरामी देख्छ।
ऊ आफै नक्कली छ,
अरुलाई नक्कली भन्छ ।

ईमानीको ईख मार्न,
बेइमानीसँग घाँटी जोड्छ।
आफ्नो दूनो सोझ्यायाउन,
देशको धुरी भाँच्छ।

ऊ आफै झेली छ,
अरुलाई झेली देख्छ।
ऊ आफै घाती छ,
अरुलाई घाती देख्छ ।

आफू अग्लो देखिन,
अर्काको गोडा भाँच्छ।
आफ्नो लाज छोप्न,
अर्काको धोती तान्छ।

जे छ उसैको छ, हाम्रो नेपालमा,
साधुलाई शूली, हाम्रो नेपालमा।

०००
गाेरखा