नेपाली हास्यव्यङ्ग्य अनलाइन पत्रिका

हरि कोर्काली :

आ… कविजी
कति बसिरहनु हुन्छ
यस्तो उखरमाउलो गर्मीमा पनि
बुढो तालु तताएर
सासै थुनि दिने
धुलो र धुवाँ पचाएर
यस्तो खस्रो हल्लालाई पनि
बुढेसकालले कर्‍याम कर्‍याम चपाएका
कानमा पसाएर ।

निस्कनु होस् शालिकबाट बाहिर
र, जाऔँ बरु हिंड्नुहोस्
उही तपाइँलाई साह्रै मनपरेको
अलकापुरी कान्तिपुरीतिर
दुईचार दिन घुमौंला
खोजी खोजी रोजी रोजी
त्यहाँका रामरउसहरूमा झुमौंला
उस्तै छन् कि बदलिए डिठ्ठा–बिचारीहरू हेराैँला
कस्तो हुनुपर्छ अबको बधुशिक्षा
बुझौँला
अनि आएर
जोडदार पाराले लेखौँला
हुन्न र ?

जाऔँ कविजी !
गएर
कान्तिपुरीभित्रको
अलकापुरी घुमौँ
देशी विदेशी चपलाहरूलाई
नजरका ओठले चुमौँ
पालिस र मालिसका नाममा
छ्यासछ्यास्ती खुलेका
तरुनीबरुनीशालाहरूतिर छिरेर
चपलाहरू अझै अबला नै छन् कि
सबला भैसके
बुझौँ
डान्सबार र डिस्कोथेकतिर घुसेर
आधुनिक मेनका, उर्वशी र तिलोत्तमाका
नृत्यहरू हेरौँ
शहर घुमेर
सुरूपिणीहरूमा मौलाएको कमनीय सौन्दर्य हेरेर
आँखाको प्यास मेटौँ
ठाउँठाउँमै विक्रीमा राखिएका सोखहरूलाई
खोजी खोजी अभिनन्दन गरेर
शारीरिक स्फूर्तिलाई ताजातर तुल्याऔँ
अनि फर्किएर
फुटकर पनि
जोडदार पाराले लेखौं
हुन्न र ?

आ…. कविजी !
ल, बन्द गर्नुहोस् त्यो पुरानो फुल्टिन
झर्नुहोस् तल र
धुनुहोस् त्यो हातमा लागेकोे मसी
अनि हिंड्नुहोस्
जाऔँ अलकापुरी तुल्य कान्तिपुरीतिर
दुईचार दिन घुमौँला
रामरउसले मन धोएर
स्फूर्त भएर फिरौँला
र फिर्दा
ल्यापटप र अरू नयाँ नयाँ साधनहरू पनि ल्याएर
छिटो छिटो गरेर लेखौँला
जोडदार पाराले
हुन्न र ?

०००
भक्तपुर