नेपाली हास्यव्यङ्ग्य अनलाइन पत्रिका

बद्रीप्रसाद दाहाल :

मन्त्राणी जति छन् धनाढ्य अहिले, मन्त्री सबै निम्छरा ।
पेवापात दहेज टन्न घरमा, लक्ष्मीसँगै अप्सरा ।।
धेरै दीन दरिद्र टाट पहिले, दुर्भाग्यशाली थियौ ।
लक्ष्मीकै वरदानले खरबका, स्वामी सुनामी बन्यौ ।। ॥१॥

चिल्ला कार नयाँ-नयाँ महल छन्, उद्योग नाना थरी ।
धेरै बैंक र बित्तका निगममा, देखिन्छ हिस्सा अति ।।
सिन्को सम्पति छैन नायक कठै ! के सर्वमारा भनौं ।
सासू औ ससुरा सुता सुत धनी, के सर्वहारा गनौं ।। ॥२॥

तिम्रा सन्तति जो पुगे पर पुगे, सम्पत्ति पैसा लिई ।
हौ कम्रेड गरीब दीन बबुरा, क्यै छैन तिम्रो जिमी ।।
छाला ओड्दछ बाघको जतनले, बठ्याइँमा स्यालले ।
ऐहा खेल्न प्रवीण दक्ष अगुवा, भन्ने छ है कालले ।। ॥३॥

साली पुत्रबधू पनातितकका, खाता विदेशी घर ।
भन्छौ सम्पति छैन देश-जनता, मात्रै म हूँ सेवक ।।
यस्तै साधु विडाल स्वर्ण मृग भै, झुक्क्याउँदै भोटर ।
अर्कोपल्ट जितेर बिल्डिङ बढून्, चिल्ला नयाँ मोटर ।। ॥४॥

धोबीको रङले विशिष्ट हुन गै, छक्याउने जम्बुक ।
‘जम्बू’ कै उजुरी परेर उहिले, पारेछ सिंहै मुख ।।
होला त्यै इतिहास काम नगरे, सिद्धिन्छ तिम्रा दिन ।
चम्बू भै अब धाक छोड दुनियाँ, झुक्किन्न है छिन्छिन ।।

०००
धादिङ