नेपाली हास्यव्यङ्ग्य अनलाइन पत्रिका

रमेश समर्थन :

हाेक्काहाँ गरियाे म मात्र भनियाे ऐले त्यही काल भाे
भ्रष्टाचार बढ्याे सबैतिर निकै बेहाल नेपाल भाे
आफ्नाे खर्च पुर्‍याउनै नसकिने वित्तीय यै हाल भाे
सुत्ने मात्र पुगे सुते सदनमा उल्टाे सधै चाल भाे ।

तन्नेरी त लखेटिए जति थिए मेरा विराेधीहरू
बाघे झप्पु लगाइयाे अब सबै थन्के नि खाेकीहरू
खाेक्दैमा पुगियाे विदेश, पथमै मारेर राेगीहरू
आफू मात्र बने पुग्याे मरिरहून् यी मूर्ख ढाेंगीहरू ।

अल्छीलाइ कख्याइयाे र हनुमान् जाे जाे थिए पालियाे
हावा मात्र उडाइयाे धरहरा सम्मानकाे ढालियाे
चर्का भाषणका छिटा बरबरी चाैतर्फ फैलाइयाे
खानै मात्र त आइयाे सदनमा जे जे जुट्याे खाइयाे ।

०००
रूपन्देही