नेपाली हास्यव्यङ्ग्य अनलाइन पत्रिका

रामशरण न्यौपाने :

जो जो पुग्दछ बस्न उच्च पदमा बिक्छन् खुराफातमा
लाग्छन् दाम बटुल्न खातिर तिनै यो राष्ट्रको घातमा
गाँज्यो लौ अब देश झन् विकृतिले ऐश्वर्य पारे पिठो
फित्कौली अब भ्रष्टका उपरमा हानोस् झटारो छिटो॥१

धेरै शुल्क र दस्तुरी पनि बढे झन् मूल्य चर्को भयो
आगो शोषणको धपक्क छ यहाँ सातो सबैको गयो
बाँच्ने हो कतिसम्म घायल बनी यो जिन्दगानी टिठो
फित्कौली अब भ्रष्टका उपरमा हानोस् झटारो छिटो॥२

घोटी हाड हुँदैन आय गतिलो चल्ने गुजारा पनि
कैयौँ लोक फसे विदेश दगुरे कैयौँ दुखी छन् अनि
नेपाली कति बाँच्न बाध्य रहने खाएर खोले गिठो
फित्कौली अब भ्रष्टका उपरमा हानोस् झटारो छिटो॥३

छन् सामन्त नयाँ नयाँ मुलुकमा खाएर कालो धन
सेखी गर्न तयार छन् अझ तिनै गिर्दैन पापी मन
आँखा कानुनको परेन तिनमा छन् नोटका जो बिटो
फित्कौली अब भ्रष्टका उपरमा हानोस् झटारो छिटो॥४

बस्छन् शब्द चपाइ भाव पिउँदै नेपालवासी कति ?
होस् साहित्य समाज देश हितमा पीयूष धारा जति
साराको मन पेट भर्न रसको लौ भोज पाकोस् मिठो
फित्कौली अब भ्रष्टका उपरमा हानोस् झटारो छिटो॥५

०००
भक्तपुर