नेपाली हास्यव्यङ्ग्य अनलाइन पत्रिका

घनश्याम रेग्मी :

मङ्सिर महिना घर्किन लाग्यो
मौसम मधुरो फर्किन लाग्यो
महिना जाला लगन जुरेको
विवाह अब होस् शीघ्र लुरेको ।

सबतिर गर्छन् गुनगुन चर्चा
भित्र तयारी सुनियो पर्चा
चामल कुटियो ढकढक पारी
मास र मसुरो दाल तयारी ।

टपरी र दुना देख्छु गरेका
गहना कपडा खरिद भरेका
अब शुभ निम्तो पत्र छपाऊ
गाउँ गाउँमा शीघ्र पठाऊ ।

कमल फुलेको मस्त जवानी
सुन्दर छन् ती दुलही नानी
माहुर चन्दन युक्त ललाट
शुभ साइतमा हिँड घरबाट ।

फनफन फन्का सात घुमेर
देव पुकारी अग्नि पुजेर
डरडम बाजा डेक बजाऊ
नाच लगाऊ बसमा जाऊ ।

सटकट विधिले यज्ञ सकाऊ
दुलही लिइकन झटपट आऊ
अझ पनि चाला अलमल देखेँ
समय नफालून् भनिकन लेखेँ ।

अझ पनि लफडा कुन हो बलियो
बाह्र भाइमा किचलो किन यो
समय घर्कियो अब ता झन् झन्
दुलहा कुन हो भ्रममा सब छन् ।

सहने किन हो अझ अपमान
द्रुततर खोज्नू शीघ्र निदान
छलफल चाँडो पार लगाऊ
दुलहा कुन हो टुङ्गो लाऊ ।

वरको दुलही घरजम हुनको
छरछिमेकमा भोज छ गुनको
अब त नजागे तिमी पछि पर्छौ
अहिले नगरे कुन दिन गर्छौ ?

हेर्न छ राम्रो घरजम तिम्रो
एक सदीक्षा अपलक हाम्रो
वात भएका छन् अनगिन्ती
कसले रोक्यो निस्किन जन्ती ?

०००
विकास चोक ५, चितवन