नेपाली हास्यव्यङ्ग्य अनलाइन पत्रिका

घनश्याम रेग्मी :

नयाँ पार्टी बन्यो हाम्रो आलु चिन्ह चुनावको
देशको आत्मसम्मान बोकेको जन भावको ।
तरकारी मिठो आलु नेतृत्व तालमेलमा
आलुजस्तै मिली चल्छौँ सत्ताको यस खेलमा ।

भान्सामा जसरी आलु भुटिन्छ तर्र तेलमा
हाम्रा नेता बसेका छन् खपेर जेल नेलमा ।
आगोको तापमा जल्दै आलुले स्वाद भर्दछ
समस्या देशको के हो हामीले बुझ्नु पर्दछ ।

हाम्रो पार्टी ठुलो बन्छ आउँदो यो चुनावमा
पकौडा वा समोसा के रुचि हुन्छ जुनाफमा ।
चाहे चिप्स बनाए भो भुजिया पनि बन्दछ
भएमा मसला हाल नभए जे छ चल्दछ ।

नेतृत्व आलुझैँ हाम्रो राम्रा नेता भएपछि
ठ्याक्‌र्‍याक्कै पुग्छ सत्तामा जनता मोडिए पछि ।
सत्ताको स्वाद भान्सामा नारा हो तेल घन्किने
आलु पार्टी निकै प्यारो पाहुना पनि थन्किने ।

भान्सामा चाहिने आलु चाहिन्न देशमा किन
जिताऊ आलु साथी हो आलुका फर्किने दिन ।
आलु हो जनको आस्था आलु जीवनको धन
आलु खाएर पेडाको धाक नेतृत्वको मन ।

डल्लो लाम्चो जुनै आलु फलेमा बेच्न पाइने
बिके होला भए राम्रो नत्र ता खान चाहिने ।
आलु निर्यात हो लक्ष्य आलुमा के कमी छ र
आलुले बन्छ नेपाल विश्वमा आत्म निर्भर ।।
~इति आलु पुराण ~

०००
चितवन