नेपाली हास्यव्यङ्ग्य अनलाइन पत्रिका

घनश्याम रेग्मी :

हामी मानव हौँ खुला हृदयले बोल्ने र हाँस्ने मन
हाम्रो जीवनमार्गमा कति कुरा चाहिन्छ साथै धन
हो मेरै सुबिधा निमित्त धन यो मैले कमाएँ किन
राम्रा काम हुँदा जुटेन रुपियाँ के काम मेरो धन ?

पर्छन् यी व्यवहार खाडलहरू पुर्नै नसक्ने गरी
चाहिन्छन् रुपियाँ तथा धन सधैँ पुग्दैन कस्तै गरी
शिक्षा लालनपालनादि सबमा चाहिन्छ केही धन
यो बेला उपयोगनिम्ति नभए के काम मेरो धन ।

पर्छन् पर्व र चाडवाड घरमा संस्कार धेरै थरी
झुल्किन्छन् कति पाहुना समयमा आत्मीय पाना भरी
मेरा गाउँ बजारमा रहरका दोकान खुल्छन् किन
यस्तोमा नजुटे र लाजिन परे के काम मेरो धन ।

साथीले पनि सापटी अघि दियो माग्दा म खाली थिएँ
लाग्दा रोग थला परेँ अझ उनै साथी गुहार्ने भएँ
बाधा विघ्न परेछ गाउँघरमा पर्नेछ मैले दिन
यस्तोमा कहिल्यै फुकेन मन खै के काम मेरो धन ।

मेरो गाउँ समाज मन्दिर बनोस् उत्साह राख्दै छ रे
मेरो नाम परेन लिस्टतिर खै लोभी छ भन्छन् अरे
मैले भोलि जवाफ के दिनु उता के गर्नु पर्ला भन
मान्छे बन्न गरेँ उपाय तर के मान्छे बनेँ लौ भन ।

मैले राख्न सकेँ कतै बचत के अड्को र फड्को हुँदा
गर्जो टार्न कहाँ कहाँ कति कुदेँ मिल्दैन निर्धो रुँदा
अर्काको गहना लुगा र कपडा देखी म जल्ने किन
मौकामा उपयोग गर्न नसकी कौडी भयो जीवन ।
क्रमशः

०००
विकास चोक, ५ भरतपुर, चितवन