नेपाली हास्यव्यङ्ग्य अनलाइन पत्रिका

ईश्वर पोखरेल :

साथीहरूले गिल्ला गरे–
“लौ, यस्तो मरञ्याँसे तेरो पोइ ?”

जवाफमा उनले लाचारी व्यक्त गरिन्–
“वैदेशिक रोजगारीले गर्नु गर्‍यो :
पढेलेखेका केटा पनि विदेश
खाइलाग्दा केटा पनि विदेश
राम्रा केटा पनि विदेश
देशमा ‘गरी–खाला’ जस्तो कोही पाइएन ।
यी पनि पासपोर्ट बनाएर भिसा पर्खिदै रहेछन्;
लटपट पारियो;
जो भेटियो–
झटपट घरजम बसाइयो ।”

साथीकी नातिनीले सोधी–
“तपाईहरूको पालामा पनि त्यस्तो ?”

“अनि यो समस्या कहाँ आजको मात्र हो त !
मुनामदन पढिनौ ?
विश्वयुद्धको विभीषिका थाह छैन ?
बहादुर, दरबान, कुल्ली र कान्छा
लाहोरदेखि मलाया छाउनीसम्म
सबै कथा हाम्रै त हो !”

०००
काठमाडाैं