नेपाली हास्यव्यङ्ग्य अनलाइन पत्रिका

बोल्नु बोलेँ
भन्नू भनेँ
खुलेरै सुनाएँ मनका कुरा
र पत्याएँ पनि तिम्रा कुरा
आजित भएको छु आज
सुन्नु सुनाउनु ब्यर्थ लाग्दैछ
बोलिको धर्म मरेछ
मलाइ अब बोल्नै मनै छैन
कृपया मलाइ कर नलाऊ ।

मान्नु मानेँ
झुक्नु झुकेँ
बुझेरै इज्जत दिएँ तिम्रो नेतृत्वलाई
र आशा पनि गरेँ प्रशस्तै
दिक्दार भएको छु आज
विश्वास नै विश्वासहीन लाग्दै छ
आदरको अर्थै डढेछ
मलाई अब झुक्ने मनै छैन
कृपया कर नलाऊ ।

हेर्नु हेरेँ
टेर्नु टेरेँ
सोचेरै हिरो बनाएँ तिमीलाई
ठानेँ, बहर हो गोरु बन्ने छ
दुर्भाग्य, बोको परेछ
चकित छु आज
हेर्नू र टेर्नु ब्यर्थ लाग्दैछ
अब मलाई हेर्नै पनि मन छैन
कृपया मलाइै कर नलाऊ ।

देख्नु देखेँ
लेख्नु लेखेँ
फुँदा जोडी जोडी उल्क्याएँ तिमिलाई
कुवालाई समुद्रैतुल्य बनाएँ
र पट्पट् फुटेको खेत सिँच्ने सपना बोकेँ
सिर्फ मिथ्या
नायक देख्नु र लायक लेख्नु दुबै ब्यर्थ लाग्दैछ
अब मलाई लेख्नै मन छैन
कृपया कर नलाऊ ।

२०७१ श्रावण
काठमाडौं