नेपाली हास्यव्यङ्ग्य अनलाइन पत्रिका

बिर्तामोड यहाँ कवि आए
सिर्जे नव संसार
गोष्ठी सकियो फर्कन लागे
कान्तिपुरी घरबार ।
खलासी….

ईस्वरवल्लभ अघि अघि लागे
डाक्टर तुलसी पछि पछि लागे
व्याकुल पाठक ज्ञानु पाण्डे
वाकर र निराकार ।
खलासी….

कवितामा खकुरेल रेल भो
निर्मोहीको काव्य गुञ्जियो
श्रवण मुकारुङ गीत गाउँछन्
बस्र्यो रसको धार ।
खलासी….

चोलेश्वरसँग बसे जिताली
राजब थपडी मार्छन् ताली
रावाखोले दहाल गाए
तरियो कोशी पार ।
खलासी….

भुटुवा माछा झुरुम झुरुम भो
मदिसे चिउरा कुरुम कुरुम भो
दुधियाको आचमन गरेरै
सन्ध्या हुन्छ अपार ।
खलासी…..

लहान आई चालक भन्छन्
गर्नुहवस् ज्यूनार
रोटी काँचो दाल छ खल्लो
सारै पीरो अचार ।
खलासी….

मञ्जुल लेखी मात्र रहन्छन्
नयाँघरे कवितामै झुम्छन्
शारदा दिदीको फर्माइस
मस्त छ सब परिवार ।
खलासी….

पूजा अन्ताक्षरी थाल्दछन्
महेश रेग्मी भाखा हाल्छन्
गौतम पदम र कृष्ण पहाडी
बिभु घिमिरेको प्यार ।
खलासी….

आज रात नै नबिते हुन्थ्यो
यात्रा कहिल्यै नसके हुन्थ्यो
अथवा संयोग परोस् यस्तै
यात्रा वारम्वार ।
खलासी……

२०५४।९।८। र ९ मा बिर्तामोडमा गणेशमान सिंह अध्ययन प्रतिष्ठान र नेपाली लेखक संघ
झापा शाखाको आयोजनामा भएको वृहत् काव्यगोष्ठी सकेर फर्कंदाको संस्मरण ।